Filmstar lar Alec Baldwin chuan cinematograpber Haylna Hutchins kah-hlumnaah mawhphurtu a ni lova, silai hmetpuaktu a nih loh thu a sawi.
Hei hian thumum awm hlei thei lo pawikhawihna thleng chungchangah inhnialna leh thu inchuhna nasa takin a thlen chho dawn e.
Thla hnih liamta a thil thlen hnu-a interview a hmachhawn hmasak berah, “Silaiin tumah ka tin ngai lova, ka hmetpuak ngai hek lo. Chutiang a thleng ngai lo,” tiin ABCS news a hrilh.
Interview chipchiar hi la tlangzarh tur a ni a, amah kawmtu Mr Shtephanopoulous chuan minute 80 chhung biangbiakna boruak a rit em em a, a ruh leh thling bawk hawkin phochhuah vek a ni, a ti.
A sawi zel danin, Mr Baldwin (63) hi mang-ang takin awm mah se, a thu sawi a fel fai a, peh-hel kual vel a nei lo, a ti bawk.
“Kum 20 liamta chhung khan ABC tan interviw sang tam tak ka lo kalpui tawh a, tun tum hi ka tawnhriat tawhah chuan boruak a la rit ber ang,” tiin a sawichhuak hial.
Mr Baldwin hi film lar tak tak- Glengary Glen Ross leh The Hunt For Red October-ah te khawvel hriat thamin a inlan a, US sketch show Saturday Night Live-ah Donald Trump lemah changin hneh rem rem takin a invawrhchhuak tawh bawk.
Tarlan tawh angin, October 25 khan New Mexico-a silai hmehpuahna vanga thihna thleng leh hliam tuar te hial an awm hnu-ah Hollywood film, Rust siamna hmuna silai hman chungchangah thu inchuhna a nasa nghal hle.