Mizoram football team chuan Santosh Trophy North East Zone Qualifier a inkhel hnuhnung berah 1-0 in Manipur an hneh lova. Head to head record hmangin Manipur hi final rounds khel turin an tling.
Khuman Lampak Stadium-ah Manipur in minute 63-naah Ng Bedeenpar Moyon hmangin goal an khung.
Mizoram in an striker hruai pahnih zinga pakhat a inhliam avangin a fit tawk lova, an match hmasa zawkah Nagaland an khelh tumin Lalhriatpuia chu referee pressure zawh loh avangin hnawhchhuah a ni a, hei vang hian Manipur lakah a khel thei lo.
Striker pawhchawp nena khelin Mizoram in chance tha an neihte a hmawr an bawk thei lova, Aizawl FC enkawl tawhtu Gift Raikhan-a pawlte lakah an tlawm.
Mizoram team manager K. Lalenghluna chuan, “Vawiinah kan vanduai a, centre forward pahnih kan hruaite hliam vang leh hrem avangin an khel thei lo. Hei vang hian striker kan pawtchawp a, kan inbuatsaih chhung zawnga full-back a training tawh kan hmang a, kan vanduai ta a ni.”
“A khelh hrim hrimah kan kheltha hlawm a, huntawp dawn thlengin chance tha kan insiam a, mahse a hmawr kan bawk thei lo.” tiin The Zozam Times a hrilh.
Tun tum qualifier-ah Mizoram in squad naupang an hruai a, player tawnhriat nei tam tawhte an hruai thei lo.
“Chhuanlamah kan hmang lo chungin kan inbuatsaihnaah kan vanduai a, kan senior player, starting XI a tel ngei ngei tur pathum kan hruai thei lo. Covid vangin player tha hruai theih loh kan nei nual.”
“Manipur hi an tang em em a, final rounds an tlin lohna a rei tawh avangin tun tumah an tang a. A thlengtu an ni chungin hotel-ah an team an indah tawp a. Keini official lam thlengin pressure min siam an thiam a, tlin tumin kawng engkimah an bei.” tiin The Zozam Times zawhna a chhang.