National Expert Group on Vaccine Administration for Covid-19 leh National Technical Advisory Group on Immunisation chuan naupang kum 12 leh 17 inkarte tana Covid-19 vaccine pek tur atana duan pathum enchhin mek a nih thu health ministry chuan Zirtawpni khan parliament-ah a sawi.
Naupangte tana Covid-19 vaccine hman theih leh theih loh tur hi Drugs & Cosmetics Act thu angin enchhinna a paltlang hlawhtlin leh tlin lohvah a innghat a ni.
“Tunah hian ZyCoV-D vaccine, Cadila Healthcare-in an siam chu ram chhunga damdawi lama thuneitu, Drug Controller General of India (DCGI)-in emergency-a hman theih tura buatsaih turin a ti tawh niin Union Minister of State for Health Bharati Pawar chuan a sawi a. Enchhinna hi thawh thumna an kalpui mek tih a sawi bawk.
Pawar chuan Bharat Biotech pawhin Covaxin chu naupang kum hnih leh kum 18 inkarah Phase II/III enchhinna a kalpui mek tih a sawi a. Serum Institute of India pawhin Nanoparticle Vaccine (liquid), Covovax chu enchhinna Phase II/III an kalpui mek tih a sawi.
Heng bakah hian Pawar chuan Biological E Ltd pawhin an damdawi siam chu naupangte hman theih tura enchhinna an kalpui mek thu a sawi bawk.
Ram chhunga invenna damdawi siam chhuahte enchhin mek a nih bakah hian American pharmaceutical company Johnson & Johnson chuan khawvel pumah an damdawi siam chu enchhin Phase II/III an kalpui a. India pawh enchhinna an kalpuina zinga pakhat a ni bawk.