Tun hnaiah Bairabi ramri-ah ram chhung venhimna kawngah sorkar hlawhchhamna (security lapse) tum thum a thleng.
December 2, 2021 zan khan Kolasib bawrhsap Dr H. Lalthlangliana chuan Bairabi khawtlang hruaitute leh Bairabi-a duty police hotute meeting neihpuiin, ramri ven kawngah tan lak a ngaih thu a hrilh.
Kolasib bawrhsap hian tun hnaiah Bairabi chhehvelah ramri venhimna kawngah sorkar hlawhchhamna tum thum a thleng niin a sawi a. Assam police-ten lei (bridge) dawhna hmanrua min ruksak thei te, Mizoram police duty lai ngei Assam police-in an man thei chu Mizoram police-te mualphona lian tak a nih thu leh pawi a tih thu a sawi.
Hei bakah hian police-ten an tih tur an tih loh avangin zirlai pawlte an chet chhuah a ngai thin chu tha lo a tih thu a sawi bawk.
“Ramri venhim hi police-te tih tur a ni a, NGO-te an inrawlh chuan boruak tha lo zawk a thlen zui palh theih avangin, chutiang a thlen loh nan police-te an inthlahdah a thiang lo a ni,” Kolasib bawrhsap hian a ti.
Dr H Lalthlangliana hian, “Vairengte daia inkahna avangin Assam police an mualpho hle a. Chuvangin, englai pawhin kan panna lai zawngin min enthla reng a, thiam takin min beih let dan tur an dap reng a ni,” tiin, ramri-a duty police leh khawtlang hruaituten magistrate an thawhpui that a ngaih thu a sawi.
“Fing tak leh thiam taka hma kan lak thin a pawimawh a. Assam police-te hian an hmingchhiat thup nan leh hmingthat lak tumin kan panna lai zawngin min enthla reng a ni tih kan hriat a pawimawh,” tiin, Kolasib bawrhsap chuan thil thleng hmasa apiang police-ten magistrate hnenah report pe thin tawh turin Bairabi khawtlang hruaitute leh Bairabi-a police hotute a hrilh nghal bawk.