Bay of Bengal-a deep depression inmung chu Zirtawpni chawhnu khan Cyclone Jawad-ah a insiam ta tih Indian Meteorological Department chuan a sawi a, Pathianni chawhnu hian Odisha-a Puri bulah khawmual a kai dawn niin a sawi.
IMD Director General Mrutunjay Mohapatra chuan thuthar lakhawmtute a kawmnaah cyclonic storm hi Vishakhapatnam chhimchhak km 420 chuanga hlaah awm mekin darkar khata km 80 thlenga chak thlipui a keng niin a sawi.
Mohapatra chuan Cyclone Jawad hi hmarthlang hawi zawnga kalin a hawi zawng thlakin Puri bulah khawmual a kai a rinawm thu a sawi.
Inrinni tukah hian Bay of Bengal khawthlang lam laili, Andhra Pradesh hmar lam leh Odisha vaukam hnaih a thlen rin a ni a. A ken tel thil pawh a hriat tan dawn niin a sawi.
IMD chuan sangha manna lam chawlhsan tur leh a thawhna tur hmuna chengte pawh ina tawm turin an rawn a. Met department hian a thawhna tur velah hian lirthei leh mihring chevel pawh thunun a that thu a sawi bawk.
Odisha, Andhra Pradesh leh West Bengal-a Ganges phaiah ruah tam tawk tak leh thli pawh na tawk tak tleh tura sawi lawk a ni bawk.
National Disaster Response Force (NDRF) Director-General Atul Karwal chuan Odisha, West Bengal leh Andhra Pradesh-ah team 46 an chhawp thu a sawi a. Cyclone dinhmun thlir hian Zirtawpni tlai khan cabinet secretary hovin National Crisis Management Committee an thukhawm bawk tih a sawi.
IMD chuan Andhra Pradesh chhim lam vaukam leh Odisha hmar lam vaukamah chuan Cyclone Jawad a hnaih zel avangin Zirtawpni zan atanga ruah tam tak sur turin a sawi lawk a. Andhra Pradesh hmar lam vaukam – Visakhapatnam, Srikakulam leh Vizianagaram pawh telin, hmun thenkhatah chuan ruahpui vanawn a sur ngei dawn niin an sawi.
Met department Odisha-a Gajapati, Ganjam, Jagatsinghpur district-ah te Inrinni hian ruah tam tak, cm 20 chuang a sur dawn niin an sawi a. Hmar lam vaukamte pawhin Pathianniah ruah tam tak an dawng dawn niin a sawi lawk bawk.
Cyclone Jawad avang hian India hmarchhaka state thenkhat – Assam, Meghalaya leh Tripura-ah pawh Thawhtanni leh Thawhlehni hian ruah a sur rin a ni bawk.