PC party president Lalhmangaiha Sailo-in COVID19 do kawnga Delhi sorkar hmalakna tha a tih thu leh Mizoram sorkarin entawn se tha a tih thu a sawi.
PC party office bearers meeting nimina neihah he thu hi PC party president chuan a sawi a. Tunhnaia Delhi-a a zin chungchang sawiin, Delhi sorkarin COVID19 do kawngah a tir atanga tun thlenga khua leh tui te tana phurrit lutuk tur a ven that thu a sawi.
Mizoram sorkar huaihawta COVID19 dolet kawnga political party hrang hrang inrâwnkhawmnaa PC party-in hmalakna tura rawtna an thlen te Mizoram sorkarin a ngaihpawimawh tawk loh avangin rei tak hri kai an kiam theih loh phah nia a hriat thu Lalhmangaih Sailo chuan a sawi bawk.
PC party president chuan kum 2023 inthlanpui lo awm turah sorkarah an tel ngei dawn nia sawiin, “PC party policy leh programme min tâwmpui thei, ram veitu, a ngaihna hria leh mipuite rinkai tak takte nen pawl leh party bik sawi lovin kum 2023 inthlanpui lo awm turah sorkar thar siam turin PC party chuan chak taka hmalak a tum a ni” a ti a. “Party bil sorkarnaa beidawng tawhte leh mipui sorkar siam duhtute zawng zawng he kan ruahmanna kawnga ke pen puiah ka sawm a ni,” a ti bawk.