Party sawi lovin ramri committee-ah party tin kan telh : Tawnluia


MNF senior vice president, Deputy Chief Minister Tawnluia chuan ram leh hnam issue-ah MNF sorkarin party bik sawi lovin ramri boundary committee-ah pawh party hrang hrang aiawh an telh kim vek tih a sawi.
He thu hi nimin Hnam Rûna MNF party chhung inkhawm neihah a sawi a, state thenawm nena ramri buaina chungchang ngaihtuah tura sorkarin boundary committee a dinah tih bik nei loa party hrang hrang an telh kim vek thu te, tlawmngai pawl leh kohhran thlenga an sawm thu a sawi a, “Boundary committee hi tum thum kan thukhawm tawh a, lungrual takin hma kan la ho mek,” a ti.
Thusawitu dang, MNF Adviser, Minister of State Dr K Beichhua chuan ruihhlo do chhunzawm zelna turin Excise & Narcotics hnuaiah thawktu lak belh tum mah se Covid-19 leng avang an tum anga an kal theih loh thu a sawi.
Dr K Beichhua chuan, “Ruihhlo dovin vawi tam tak ramhnuaiah kan lut a, kei ngei pawh ka lut thin,” a ti a, thawktu 380 vel chauh an nei chungin hma an sawn em em thu leh MNF sorkarin ruihhlo an tirem vek dawn an ti lo a; mahse, theihtawpin an do zel dawn tih a sawi.
Vawk hri chungchangah Dr K Beichhua chuan harsatna tlangpui a sawi a, “Tun dinhmunah hri avangin vawk thi 29,803 a awm tawh a, ASF rinhlelh vanga suat tawh 10,380 leh hri kai rinhlelh thi 533 a awm tawh,” a ti a. Vawk hri avanga harsatna tawk hi khaw 271 an awm thu a sawi bawk.
Hri a kiang ang a, theihtawp an chhuah zel dawn tih sawiin, MNF sorkar chu Pathian hriak thih a nih tlat thu leh an pu ber zin pawh hlawhtling takin a lo haw ang a, hun khirh tak karah hma an sawn dawn tih Dr. K.Beichhua chuan a sawi bawk.
He hunah hian MNF party zawm thar mi pakua lawm luh an ni a, an zingah MSU general headquarters president hlui, Vanlalliana Khiangte; Sialhawk INC VC member pahnih, J. Rampanmawia leh Lalremchhunga te an tel.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427