ZPM thalai chuan Sakawrhmuituai tlanga skywalk sakna tur sum leh, Chaltlang leh Durtlang inkara ropeway sakna tur sum tihchingpen nia lang chungchang chhui chiang tura CBI ko lut turin chief minister an ngen.
Nimin khan ZPM thalaite hian chief minister hnena an ngenna lehkha an theh lut a, mipui chanai eirukna kawnga inhnamhnawihten hremna an hmuh theihna tura CBI kolut ngei turin an ngen tih an lehkhaah hian an tar lang.
Hemi hma hian dikna tun din phutna programme hmangin Vanapa Hall kawtah an pungkhawm a, ZPM thalaite hian skywalk leh ropeway siamna tur sum tihchingpen awm chungchang chu CBI chhui an phut thute au chhuahpuiin, he mi atana sum pek chhuah dan sawifiah turin finance minister hlui, Lalsawta leh tourism minister hlui, John Rotluangliana te an phut thu an auchhuahpui bawk.
He huna thusawitu, ZPM Thalai headquarters senior vice president Dr C Lalrammawia chuan skywalk leh ropeway project hlamzuih chungchanga Congress leh MNF party-te inkawhtawnna politics, thudik hai lan tumna tak tak awm si lo chu mipuiin an ning tawh tih a sawi.
MNF-in Lokayukta-a FIR an thehluh chu hmai an phih faina maiah an ngaih thu sawiin, Lokayukta an ring lo tihna ni lovin, a hnu chhuitu atana home dept. hnuaia ACB an hmang tlat chu a dik lo an tih thu a sawi a, thudik hai lan a nih theih nan Congress-in an duh dan leh tourism minister ni mekin a lo intiam tawh angin CBI chhuitir ngei turin an phut tlat tih a sawi bawk.