Mizoram Rural Bank (MRB) chuan Aibawk khua chu sum faia indawr tawh lohna hmun (cashless area)-ah a puang.
Sorkar laipuiin Digital India-in a buaipui meka sum fai tel lova indawr tawnna kalpui a tumnaah MRB, Aibawk Branch chuan Aibawk khaw chhung chu sum faia in dawr tawh lohna hmun ni tura an buaipui hnuah nimin tlai khan MRB Chairman V Jaya Chandra hoin bank hotu dangten sum faia in dawr tawh lohna hmunah an puang a ni.
Puanzarna inkhawm hi hripui avanga a khaw mipui huapa buatsaih a rem loh avangin Aibawk khaw chhunga sorkar department tin atangin aiawh pahnih theuh bakah NGO hrang hrang hruaitu aiawh pahnih theuh sawm an ni a. Aibawk khaw chhehvel – Tachhip, Phulpui, Sateek leh Maubuang VCP te sawm an ni bawk.
He hunah hian Aibawk PHC-ten an mamawh em em, inverter leh printer chu inkhawmah hian MRB chairman chuan CSR kaltlangin PHC thawktute hnenah a hlan nghal bawk a ni.
Cashless area atana Aibawk puanzarna inkhawm neih zawhah hian kalkhawmten online transaction hmangin chawhmeh zuar thil zawrhte an lei nghal a ni.
Cashless area-a puan a nih hnu hian Aibawk khaw chhunga bazar duh, chaw ei tur, inentir tur, sorkara pawisa pek tur nei tan leh dawra thil lei tur reng reng tan pawisa kher pe lovin online payment hmanga pawisa inpek chu a theih tawh mai dawn avangin mipuite tan awlsamna nasa tak a thlen ngei an beisei bawk.