Mizoram senior hmeichhe football team chuan Hero National Women’s Football Championship 2021-ah a vawikhatna atan semi-final an lut a. Pathianni khan Maharashtra chu quarter-final ah 4-1 in an hneh.
Kozhikode a EMS Corporation Stadium a inkhelah Mizoram in an inremdan an siksawi a, tlarhnungah defender pathum hmangin ‘high press’ an hmang a, an ti fuh.
Football hlauhawm khelin minute 10-naah Elizabeth Vanlalmawii’n goal hmahruai a khung a, Lalnunsiami’n minute 24-naah a khung belh.
First half-ah Maharashtra hian penalty an hmuh an khung lova, second half tan tirah Karen Pais chuan goal khat a khung a. Mahse minute 66-na leh 87-ah te Lalnunsiami leh Elizabeth Vanlalmawii ten an goal hnihna ve ve an khung.
Mizoram hian semi-final ah 4-2 a Goa hnehtu Railways chu naktuk hian an khel leh ang.
Huaisenna rah
Mizoram team coach Lalrozara chuan, “Vawiinah kan kheltha a, kan tactic neih a taka chantir turin huaisenna kan player-ten an lantir a, hei hi kan chak chhan a ni. An goal ven tumin offside trap an siam thiam a chuvang chuan kan goal hlauhawm tur thenkhat an dang thei zawk. An inkhelh dan tur kan hria a, chumi turin kan inbuatsaih a, vawiin chu kan inkhel a lungawithlak hle.”
“Kan team hi an inlungrual a, hei hi kan chakna hnar a ni a, player han langsar bik an awm ngai lo. Kum danga team dangte kan tluk lohna thin tlan leh diagonal ball an vawrh thinte veng turin kan inzir a, khelmual chhungah kan player-te hian kan inzir anga khelchhuak turin huaisenna an nei a. Kan tactic hmang ngam turin player an huaisen.”
“Mizoram a mipuite tawngtaipuina kan dawng nasa a, hmun hrang hrang atanga min lo ngaihven a, min lo tawngtaipui thin an tam a, hei hian nasa takin min pui.” a ti a.
“Kan tum leh turte hi India rama player tha te lakhawm an ni miau a, an tha. Mahse kan thlen chinah hian team tha vek kan ni tawh a, in huphurh viau emaw han inzuam viau tur kan awm bik lo. Chak tumin theihtawp kan chhuah dawn.” a ti bawk.