Tun thla ni 4 leh ni 5-a India parliament-a public accounts committee (PAC) kum 100 tlin lawmna, central parliament hall, New Delhi-a neiah Mizoram legislative assembly atangin speaker Lalrinliana Sailo, PAC chairman Vanlalhlana, MLA Dr. Vanlalthlana, Commissioner & secretary H Lalrinawma leh Committee officer Vanlalfamkima Sailo te an tel.
Mizoram PAC chairman MLA Vanlalhlana chu panel of chairman-a ruat niin, thusawina hun a pek a ni a. Sorkar sum hman dan en zuitu public accounts committee pawimawh zia leh house-a report pek hmanga rawtna hrang hrang siam a nih dante, chumi kaltlanga project leh programme hrang hrang enzui thin a nih dante a sawi.
Parliament PAC centenary souvenir buatsaih chu President Ram Nath Kovind-a’n a tlangzarh a. Prime minister Narendra Modi, vice president M Venkaiah Naidu leh sorkar mipawimawh dang ten thu an sawi.
President Ram Nath Kovind chuan sorkar sum hman dan entu leh chhuizuitu a nih avanga PAC pawimawh zia sawiin, chairman leh official kalkhawmte chu mahni hmun theuhah dik leh rinawm taka thawk turin a chah bawk.