Hrangturzo bialtu, Home minister ni bawk Lalchamliana’n “Inthlan dawnah chuan party hrang hrangin chak zawk nih tumin kan inbei thin a, inthlan a zawh tawh hnuah chuan khawtlang thatna turin kan thawkho thei tur a ni,” a ti.
Tun thla ni 2-4 chhunga a biala khaw panga – Bungtlang, Keitum, Hriangtlang, Khawlailung leh Hmunzawl khua te a tlawhnaah he thu hi Lalchamliana chuan a sawi a. “Mipui ta kan nih avangin min beitute leh min tanlotu zawng zawngte tan pawh kan ding tur a ni a, kan martar-te pawh khan chu chu an rilru a ni”, a ti.
Lalchamliana chuan a bial chhunga MLA fund leh hmun dang atanga hmasawnna hnathawhna tur sum leh hna te chu neitu thinlung pua khawtlang leh bial tana rotling din duhna rilru pu chunga thawk thin turin a bial mi te chu a chah a. Tuichang lei dawh mek pawh tlawhin, hnathawktu ten March 2022-a zawh theih an tum thu an lo hrilh a, an insawi anga a huna zo ngei tur leh inthlahdah lova thawk turin hnathawktute chu a hrilh bawk.
Lalchamliana chu Bungtlang HS-in HSLC exam-a zaa za an pass an lawmnaah telin Bungtlang HSS building sak thar a hawng nghal a. A biala khaw hrang hrang a tlawhnaah hian amah hmuh mamawhtute leh dilna thehluh duh nei te tan hun a hawng zel bawk a ni.