India cricket thuneitu sang Board of Control for Cricket in India chuan Inrinni khan Kolkata ah Annual General Meeting vawi 90-na a nei a. He hunah hian Cricket Association of Mizoram Honorary Secretary ni lai Mamon Majumdar chu Governing Council Member atan an thlang.
CAM Honorary Secretary hi Governing Council member ni lai niin, Governing Council hi Indian Premier League enkawltu an ni a. Term thar atan he nihna hi a chelh leh dawn tihna a ni.
BCCI rorelna lianah hian thurel hrang hrang zingah India hmarchhak state ten cricket-ah hma an sawnna tura hmalakna lian tak ni tur chu kalpui tan tura pawm a ni a. AGM hian India hmarchhak state Cricket Association ten hma an lakna tura sum an dawn tur chu season thar atang cheng vaibelchhe 12.5 ah tihpun a remti a. Cricket hmunhma sak nan cheng vaibelchhe 10 pek an ni bawk ang.
Mamon Majumdar hian BCCI secretary leh president te hnenah India hmarchhak state te aiawhin lawmthu a sawi a. “He hmalakna hian nasa takin cricket hmunhma tha kan neihna kawngah min pui dawn a, cricket hmasawnna tura pawimawh tak a ni dawn. India hmarchhak atang cricket player ten hma an sawn phah hle bawk ang.” tiin a sawi.
He rorelna lianah hian Mizoram a Suaka Cricket Ground-ah Indoor Practice na hmunhma sak chu pawm a ni a, India hmarchhak state dangte ah pawh indoor practice facility hi sak vek tur a ni a, hemi hmalakna kaihruai tur hian Mamon Majumdar hi ruat a ni bawk.