Lengteng bialtu MLA L. Thangmawia’n a biala Kawlkulh damdawiin (PHC) tlawhin, X-Ray khawl Epsilon EP Corsa (15KW 300mA), Rs 5,90,000 man leh a result print-na khawl FCP PRIMA Image Reader Rs 6,50,000 man chungchang leh he khawl bun tura hmalak dan te thawktu ten an lo hrilh.
X-Ray khawl leh a result print-na khawl hi bialtu MLA-in NH-6 kawng lai mektu Anusha Project(P) Ltd hnena an corporate social responsibility (CSR) atanga leisak tura a dil niin, Kawlkulh damdawi in phurh thlen a ni tawh a. Thawktute leh Mizoram state cancer institute-a X-Ray lam mithiam ten X-Ray khawl chu a chhuak thar ber, ZMC leh Aizawl civil hospital-ah pawh an hman ang a nih thu leh a chhuak hlui ho aia a result a fiah that zawk thu bialtu MLA chu an lo hrilh.
Kawlkulh damdawi in-a X-Ray room awmsa chu a chhuak hlui ang chi dahna tura duan a nih avangin dark room te a la awm a, heng hi khawl tharah chuan a tul tawh dawn loh avangin thiah a ngai dawn tih thawktute chuan bialtu MLA chu an lo hrilh a. Heng room siamthat hna zawh a nih hnuah Company engineer ten khawl an bun ang a, chumi hnuah Atomic energy regulatory board (AERB)-ah X-Ray khawl dah phalna tihfel a la ngai dawn tih an hrilh bawk.
Bialtu MLA chuan X-Ray khawl changkang tak petu Anusha Project (P) Ltd hotute lawmthu hrilhin, chak taka hmalak saktu Mizoram state cancer institute hnenah pawh lawmthu a sawi a. X-Ray khawl chu hman theiha peih a nih thuai theihna tura chak taka hmalaksak chhunzawm turin a ngen nghal.
Lengteng bialtu MLA hian Kawlkulh khawtlangin Helipad atana an ruahman hmun pawh tlawhin, Aviation principal consultant Wng Cmdr J. Lalhmingliana a be nghal a, remchang hmasaberah a hmunhma chu department lamin an enfiahsak tur thuin principal consultant chuan bialtu MLA chu a lo chhang.
MLA fund Rs 2,00,000 hmanga laih mek Vanchengpui-a Sente Zau agriculture link road pawh L. Thangmawia chuan a tlawh a. A bial chhunga PMGSY sum hmanga siam mek Changzawl kawng leh Vankal kawng te pawh tlawhin, sorkar laipuiin kum 2022 March thla hmaa PMGSY scheme atanga kawng laihte zawhfel vek tur a tih ang ngeia zawhfel hman tum turin thawktute a chah.
Kawlphetha megawatt 20 pechhuak thei tur Vankal solar park siam mek pawh Lengteng bialtu MLA chuan tlawhin, Khawzawl power division EE Er K Duhsanga leh SDO Er Lalhmingthanga ten Khawzawl atanga Kawlkulh area tana power lak thin chu Vankal solar park atang lak a nih tawh tur thu an lo hrilh a. Hei hian Khawzawl leh Kawlkulh inkar line hlui tawh avanga Kawlkulh leh a chhehvelin power an nei tha lo thin pawh a tih ziaawm an beisei thu leh harsatna dang a awm loh chuan kum 2022-ah hna zawh an inbeisei thu te an lo hrilh bawk.