Aizawl E II bialtu minister of state Robert Romawia Royte-in a bial chhunga – Tuithiang Veng, Saron Veng leh Chhinga Veng inkalpawhna tur lei dawh mek chu Inrinni khan a tlawh. He lei dawhna atan hian Rs nuai 200 ruahman a ni.
He lei dawhtu PWD hotute sawi danin he lei sei zawng hi metre 74.5 niin, lirthei tlanna tur zau zawng metre 5 bakah a sir tawn tawnah metre 1 ve vea zauvin kea kalna siam a ni bawk.
Bialtu MLA Robert Romawia Royte chuan Aizawl chhuahlam veng hrang hrang ten an hman tangkai tur a bial chhunga lei thar dawh a ni chu lawmawm a tih thu a sawi a. Covid avangin harsatna awm bawk mahse, hna chak taka PWD leh contractor-in an thawh avanga lawmawm a tih thu a sawi.
Tuithiang Veng local council chairman R. Lalthlamuana’n kum 20 chuang sorkar hmasa hunlaiin an dilin an beisei a, a taka lei dawh a hlawhtling thei lo nia sawiin, tuna bialtu MLA-in reilote chhunga a tak a thlen chho mek chu lawmawm an tih thu a sawi bawk.
Hemi ni vek hian Robert Romawia chuan Tuithiang MNF unit te tun thla ni 16-a Tuithiang local council bye-election lo awm turchanga a sawipui a. “Chief minister tha leh central sorkarah pawh thiltithei kan nei hi a lawmawm a, a thiltih ropui tak tak a lo langchhuak zel dawn,” a ti a. Tuithiang veng mipuite chu he inthlan lo awm tura MNF candidate Lalrinzuali vote turin a sawm.
Armed Veng pawh tlawhin, Robert Romawia chuan thlanmuala kawng chhe laite khawtlang hruaitute nen an enho a, siamtha tura rawtna sorkara thehluh tawh pawh a rang thei ang bera umzui nghal a tum thu a sawi a. Armed Veng chung leh hnuai inkalpawhna lei dawh tur pawh enin, he lei dawh tur hian UD&PA-in hma a lak thu leh contractor pawh thlan fel a nih tawh thu sawiin, work order pawh tihchhuah tawh a nih thu leh Rs. nuai 150-a dawh zawh tum a nih thu a sawi bawk.