BADP sum Rs. nuai 100 senga laih, Cherhlun – R. Tiau kawng km 11-a thui chu Inrinni khan Minister Dr R Lalthangliana’n a hawng. He kawng hi BADP 2019-2020 additional fund hmanga thawh niin, BDO Hnahthial-in he hnathawh hi a enkawl a ni.
Dr R Lalthangliana chuan, “He kawng hi kum 20 kalta, RD minister ka nih lai khan Rs. nuai 3-a bul kan tan kha a ni,” a ti a, kawng pawimawh tak a nih thu sawiin, “Nakinah chuan helaiah hian in tam tak a la din ka ring. Kawng tha kan neihah tawp mai lo ila, a ken tel tam tak hi hmang tangkai thiam ang u,” a ti.
Myanmar ram buai avanga Mizorama raltlan buaipuitute lawmthu hrilhin, “An chungah that lo chhuah zel ang che u, chu chu Pathian thu pawh a ni,” a ti bawk.
Commerce & Industry Minister Dr R Lalthangliana chuan “Commerce leh industry lamah SEDP pawh ni lo, SEDP piah lamah thil liantham tak tak chhungkaw eng emaw zat intunnunna tur kan ngaihtuah mek,” a ti a. Central lamah an bawhzui mek niin a sawi.
Kum tharah chuan SEDP hmangin chhungkaw engemaw zat an intuamhlawm theih tawh a beisei thu Dr R Lalthangliana chuan sawiin, chief minister hova minister leh MLA-te pawhin an sawiho tawh thu a sawi a. “Congress sorkar kum 10 chhung khan Covid an tuar ve lo va, development an thawh leh thawh loh chu a hrechiangtute kan ni, keini chu kan sorkar hnu lawk kum khat leh a chanve chuang awrhah Covid-in min tibuai chungin hma tam tak kan la a tawh,” a ti.