- MC Lalrinthanga
Mizoram mipuiin eiruk (Corruption) kan buaipui tanna chu, P.C sorkar laia Mizoram Synod-in CORRUPTION DO KUM tih thupui hmanga a chhuah atang khan a ni kan ti thei âwm e, C.B.I hming erawh lam rik a awm ngai lo. Pu Lal Thanhawla kaihhruai Congress Party-in sorkarna a siam atang khan eiruk thu hi a lar zual ta êm êm a. C.M Pu Hawla pawh India ram rorêlna court sâng ber Supreme Court thlengin ei ruk thu buai kum 10 chuang zet a awrh a ni.
Congress sorkar chhung zawnga C.B.I koh luh duh a, a bengchheng nasa berte chu kha tih laia Opposition Party-te an ni a, koh luh hlau ber chu Pu Lalthanhawla leh a kaihhruaite an ni. Tunlai hian C.B.I a lar thar leh ta hle mai a, a sawi lartu nasa berte chu Mizoram Congress Party-te an ni a, a duh lotu ber nia lang chu tuna sorkar-na chelhtu M.N.F sorkar hi an ni ve mai lo maw? tih turin ni 15. 11. 2021 Times of India thu chhuah hi i chhiar teh ang, “New Delhi: Expressing concern over eight states not permitting CBI to investigate cases, the supreme court on monday said ‘it is not a desirable position’ and decided to examine the issue. The court took note of the affidavid filed by CBI director SK Jaiswal in which he said that the CBI’s functioning as an investigating agency and also as a prosecuting authority was being hampered with eight states – West Bengal, Maharashtra, Kerala, Punjab, Rajasthan, Jharkhand, Chhattisgharh and Mizoram – having withdraw their genaral consent, forcing the agency to approach states to get consent on a case.”
Mizo tawngin (The Times of India, November 2021 ni 18) “New Delhi-a tih chhuah The Times of India chuan ni 15.11.2021 Monday-a Supreme Court-in a tarlan angin, India rama State pariatte chuan an State chhunga thu buai chhui an phal loh thu tar langin ‘Thil duhawm lo tak a ni’ tiin Supreme Court chuan en chian ngai thil a nih thu a tar lang. CBI Director-in affidavit a file-naa tar lan heng State pariat-te hi CBI-in thil chhui theihna leh thil tisualtute hrem theihna a neih duh lo an hnawl a ni, a ti a. Chung State-te chu: West Bengal, Maharastra, Kerala, Punjab, Rajasthan, Jharkhan, Chatisgarh leh Mizoram te an ni. Anmahni State thuneihna hnenah, chutiang ang thubuai chhui theihna dil tur chuan a phut tih a tar lang.”
Rev. C. Chanchinmawia a thih khan, opposition leader Pu Lalthanhawla leh a hote khan M.N.F thahtir tih tlukin thu an vawrh darh a, mipui pawhin kan pawm vek emaw tih tur khawpin M.N.F chaldâr-ah phung a tawp a ni ber mai. Mizoram State Police-ten an chhui bakah C.B.I ko lutin chhui a ni a, an chhui chhuahna statement pawh ram pum chhiar theiha tlangzarh a ni a, a duh tan tunah pawh hmuh theihin a la awm âwm e. Mi tam takin, “A ni maw,” an tih laiin, mi tam takin kan pawm chuang lova chung zingah chuan Pu Lalthanhawla leh a thurualpuite hi mipui la fuihpawrhtute chu an ni. Pu Hawla phei chuan 1. “Kan sorkar hunah CBI kan chhui thattir vek ang,” a ti a. 2. “Kan Legal Cell Chairman Pu Lalsawta-te’n an chhui chhuak vek tawh a, puan zar a ni mai,” a ti bawk.
Kum 2008-ah MLA thlanpui kan neih khan Pu Hawla leh a party chu hneh taka thlan tlin an lo ni ta a. CBI koh luh reng reng an sawi leh ta lova. Mizoram rorêlna sâng ber Assembly House chhungah opposition MLA-te’n Pu Hawla chu zawhna an pe ta a. Pu Hawla chuan Malkhana-a chemte te a bo vek tawh etc… tiin a chhang nawi kual tawp vel ta mai mai a nih kha… vawiin nî thlengin sawi zui a awm ta lo. Assembly-a Pu Hawla’n a chhan zawh khan Opposition MLA nih kha ka lo châk ve êm êm a, a chhan chu hetianga chhan lêt ka chak vang a ni, hetiangin, “Rev Chanchinmawia thih lai a, Malkhana enkawltu leh thu ber chu tuna Parliamentary Secretary atana i ruat, i chhak lawka thu Pu Chawngtinthanga kha a ni a, i tawngkam han hawh ve ta ila, Rev Chanchinmawia thattu dik tak chu, nang leh Pu Chawngtinthanga in ni mai lo maw?” ka ti ngei ngei ang.
C.B.I Mizorama ko lut a, eirukna leh ram rorêl dik lohna Mizoram Congress hruaitute’n an aupui vak vak hi an nihna hre chiangtute tan chuan “An va zak thei lo êm” tih loh theih a ni lova, an thu au chhuahpui leh press release an chhuah zawng zawngte hi Z.P.M party chhuah leh sawi tur ni âwm zawk tak a ni. A chhan chu Z.P.M party hi la sorkar ve miah lo, an Chief Minister tur Pu Lalduhoma pawh la Chief Minister miah lo a nih avangin an sawi ni ta zawk se, lem leh pawm dan pawh a nuam zawk ngei ang.