Myanmar sipaiten car-in mipui pung khawm su darh


Yangon khawpuia sipai sorkar duh lova pungkhawm mipuite chu Myanmar venhim hna thawktuten car-a chilin mi eng emaw zatin hliam an tuar niin thil thleng hmutute leh tual chhung chanchinbuten an tar lang.
Pathiannia thil thlenna hmun hi Myanmar-a khawpui lian ber, Yangon-a hmun thuma sipai sorkar duh loh lantirna zinga pakhatah a ni a. Ram chhung hmun dangah pawh sipai duh lohna hi lantir a ni a. Hei hi Thawhtannia an ram mipui sorkar hruaitu, Aung San Suu Kyi-i thubuai thuremna puan hun tur nena inzawma ngaih a ni.
February 1-a sipaiten sorkar paih thlaa thuneihna an chan duh loh lantirnaah mi 1,300 chuang thi tawh mah se mipui hian a theih ang angin an nawr zel a. Mipuite hian an thlan chhuah, Suu Kyi-i sorkar dintir leha sipai rorelna paih an duh.
Social media-a thlalak leh video thehdarhah chuan lirthei hian mipui pung khawm hi a su pawp a, mihring an let phung zui a ni.
Myanmar Now chuan mi panga vel an thi a, mi 15 vel man an ni bawk niin a tar lang a. A hmutute chuan mi eng emaw zatin hliam an tuar bawk niin Reuters news agency chuan a sawi.
“Mipui awmna an thlen dawn hian an khalh chak sauh va, an su tlang ta pawp a ni,” tiin chanchinbumi pakhat chuan AFP news agency a hrilh.
Mipuite hian thil an keng a, thenkhat chuan Suu Kyi-i an thlawp tih lanna banner-te an keng a, kawngpuiah an let phung tih a sawi a, thenkhat an tlan chhe bawk a. “Sipaite chu car atang an lo zuang chhuak a, silai an hmet puak zui ta a ni,” a ti.
Mipuite hi an punkhawm atanga reilo teah hetianga sut darh hi ni ta niin a sawi bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427