- Mahmuaka Chhakchhuak
South Vanlaiphai lama thil thawn kan tum avangin Sumo Stand-ah chuan kalin midangte nen chuan motor rawn thleng tur chu kan nghak a. Keini chu thil thawn tum mai chauh kan nih avangin bungrua pawh kan nei lem lo a, kan thil thawn tur thawn a, a thawnna man pawisa pek chuan chulaia kan awmna chhan chu a tawk maiin kan haw leh dawn a ni. Kan kianga midangte erawh chuan motor-a chuan an tum avangin an bungraw neih ang angte nen chuan bawr ang reng tak chungin motor chu an lo nghak thung a, a thente chu naupangte nen an niin an thawmhnawte pawh chu naupang lam thil a nih ngei hlawm ka han ring nghal deuh mai bawk a.
Zing boruak chu thlasik tih takah a vawt lam lek lek a, keini pawh chuan kawrlum hain kekawr lum kan ha bawk a, kan kianga naupangte chuan kawrlum lek kekawr lum mai bakah lukhum lum an la khumin a thente chuan puan an sin bawk a, naupangte phei chuan vawt tih hmel takin an thu tawmin an khur hlak hlak mai a. Motor pawh chu a rawn thlengin a khalhtu chuan bungraw chi hrang hrangte chu rem tak hian a remkhawm a, ka beisei aiin bungraw phurh tur chu a tam daih mai nain Sumo chungah chuan alo leng hnem a, Driver chuan a rem a rem a, zei taka a rem a ni bawk a, a hnawh khawm tam kher mai. Motor chungah chuan amah chauhin bungruate chu a buaipui avang chuan ka theih ang angin ka lo puiin hruite chu ka lo pawh pui ve bawk a, chutianga kan han buai vel laite pawh chuan a chhunga chuang turte chu ka han thlir kual pah bawkin vawt ti hmel taka naupang, mitmeng hlim tak chung si a kawrlum ha chunga puan la sin a lo thu tawm reng hmel chuan ka mit ala ber a.
Mipa naupang hmeltha tak phei chu a ni lem lo nain a biang puar lam lek lek mai baka tlema chat deuh hlek chuan ka mit ala ta riau a, chu a biang chat deuh kiang lawka a hnaptui tlem lo lawrte chuan ngaihtuahna tam tak min neih tir phah a ni. Nuihzatin ka thlir hauh lo a, hmuhsit vang lam phei chu a ni lo lehzual. Chu mipa naupang chuan kan naupan lai hun thil tam tak min ngaihtuah chhuah tirin amah ang bawk chuan keini pawh kan naupan laiin kan khaw lama haw tur motor hi kan lo chang ve tawh thinin heti hian vawt ti hmel takin kan lo thu khur ve hlak hlak tawh thin. A biang chat deuh hlekte chuan thlasik hlut zia min hriattirin thil tam tak min ngaihtuah chhuah tir phah a, a kianga a nu leh mi dangte ai chuan ka mit ala daih zawk a ni. Keini ngei pawh kan naupan laia kan biang a chat nasat theihzia leh kan nute’n min han nawh khawk sakin inbualfai hnuah thip sap sap khawpin glycerin min hnawihsak thin kha a ni a. He naupang ngei pawh hian chutiang chu ala hmabak ve thei a, sen tut khawpin a biang hi a nute chuan an la nawh sak ve mai thei a ni.
Driver nena bungraw chi hrang hrang kan buaipui lai reng pawh chuan chu mipa naupang bawk chu ka rilruah a awm reng avangin ka zuk mitmei leh zauh zauh thin a. Kan naupan laia thlasik khawvawt takah pawh inah meilum ai reng peih bik loin pawnah kan chhuak a, hnap alo tawlhin kut hnung lam hian biang vei lamah kan hru phei mai thin kha a ni a, chuvang tak chuan kan biang pawhin a chat phah reng bawk a ni a, puitling anga hnit kha kan ngaihtuahnaah a awm pha lo hrim hrim. Kan hnar atangin hnaptui rawn luangchhuak pawh nisela kan thiam chhun chu rang taka hnit luh leh hrawk thin chu a ni mai a, chubakah chuan kut hnung lama bianga hui phei hrawk chu a ni mai a, tunlai naupangte chuan chutiang chu an ching ve tawh hauh lo a, biang chat pawh an awm tawh ngai meuh lo. He mipa naupang ngei pawh hi keini ai chuan a changkang daih zawk a, a hnar atanga a biang thlenga khir phei var iar pawh a awm ve miah loh hi.
Keini phei chuan pheikhawp bun tur pawh kan nei mumal lo a, school form pheikhawk chauh kan nei a, chapal leh sleeper pawh bun tur kan nei ngai hek lo. School form pheikhawk kan bun loh chuan kelawng a ni mai a, he mipa naupang hi chuan pheikhawk mawi tak a bun a, chutah mawza nen ala bun bawk avang chuan keini hunlai ai chuan changkang tak a ni. An bungruate ngei pawh chu a rem dan danin motor chungah chuan hlangin kan phuar tha mawlh mawlh a, ka rin ang ngeiin RAMBO Polythine chhungah hian motor lem (toys) pawh alo awm a, motor satliah a ni lo a JCB ngat a nih avang chuan an khua an thlen huna a thiante kianga a han intihtheih vel dan tur chu ka han mitthla nghal bawk a, inti changtupa tak maiin khawpuia an zin dante sawi pahin a thiante kiangah chuan a tawngkam thiam tawpin dawr pakhata remote hmanga Jeep an kal tir dante chu a sawi ngeiin ka han ring a, chumi chu tinge in lei loh tih zawhna pawh a thiante atang chuan a han awm ngei nghal bawk ang a, a ni chuan financial problem lam avanga a nu chhuanlam sawi chu hre reng mahsela JCB ropui a tih zia leh an khuaah phei chuan ala hmuh ngai loh thute chu thiam takin a sawi ngei dawn si a tiin ka han suangtuah thleng bawk a. A mitmeng chungnun larh dan tur leh a thiante pawh khawih tir phal mang lo a, an kawt koa a JCB hmanga lei a han hai tir vel dan turte ka han suangtuah chhunzawm zel chuan kan lo tihdan thin vek tawh a nih avangin a boruak hip chu a nuam dawn hian ka hria a, an thianho zingah phei chuan an Boss en nghal ngei ngei pawh ka han ring tlat bawk.
He mipa naupang hlim tur zia ka suangtuah hian tuna biang chat deuh leh rang taka a hnap sut lut leh thin lai ka hmuh chuan amah anga han awm leh chakna lian tak ka neih phah a, nimahsela kei lah chu kum 40 ka lo inbangliam hman tawh bawk si. Kum 30 aia tam mahin kan inthlau tlat si a, thil theih a ni hlawl lo a, thiamna hmang pawhin lo theih ta tehreng pawh ni ila he mipa naupang lawmna leh hlimna ang hi chu ka neih phak kher ka inring chuang lo tiin nimin zing chu Ina kan haw hnu thlengin ka thinlungah a awm a.