Parliament thlasik thukhawm kal mekah a bul tanna chawlhkar khat liamta chhungin rorelna in sang zawk, Rajya Sabha-ah chuan thut hun tura tuk sa 52% chuang chu rorel tibuai leh duh lohna lantirna thleng avangin hloh nghal a ni.
Thawhtanni kal ta atanga rorel inkhawm tanah hian a bul tan phat atangin buaina a tam hle a. Ningani leh Zirtawpniah erawh boruak ziaawmin awmze nei zawka a kal theih tawh pawh beisei a ni.
Eptu MP-te chuan thil chi hrang hranga sorkar kal dan duh lohna an lantir a, heng zingah hian fur thutkhawm tawp nia an chet dan avanga rorelna in sang zawka member 12 suspend an duh loh lantirna pawh a tel.
Eptute hian suspend hi a mipui rorelna kalhmang lo va, tum bik neihna niin an sawi a; mahse, Chairman M Venkaiah Naidu chuan hrem tuarten danglamna leh ngaihdam dilna an thlen loh avangin a thu a sut duh bik lo.
MP hrem an nih duh lohna hi parliament awmna bula Mahatma Gandhi lum bulah eptute hian an lantir nghe nghe a. Parliamentary Affairs Minister Pralhad Joshi chuan heng MP-te hian ngaihdam an dil a nih phawt chuan hremna hnuk kir turin sorkar a inpeih reng tih a sawi.
Kar liam taa rorelna in sang zawka rorelna hun chhung tura duana rorel theih chu 47.70% a ni a. Ningani khan thutkhawm hun chhung tura duan aia minute 33-a rei an thukhawm thung a, hei hian kar khat liam ta chhunga rorelna hun hman zawng zawng pawh 49.70%-ah a tisang niin a sawi.
Ningani leh Zirtawpni khan eng buaina mah awm lova rorel a ni a. Ninganiah hun duan zinga 95% zet rorel nana hman niin a tukah phei chuan 100% an hmang thei.