Mizoram chhunga village council member-te intelkhawmna, All Mizoram Village Council Association (AMVCA) hruaitu thar tur thlan tum a nih laiin hruaitu ni laite hriatpui lohin MNF VC member thenkhatin sorkar hriatpui nain hruaitu nihna an inpechawp.
AMVCA hi kum 2017 khan din a ni a, an hruaitute hi district hrang hrang VC Association aiawhten an thlan chhuah a ni a, Covid-19 leng avanga hruaitu thar an thlan theih lawk loh hnuah hruaitu thar thlang tura AMVCA executive committe-in a siam laiin EM hriatpuina tel loin hruaitu chanvo insiam remna a awm niin The Zozam Times thudawnna chuan a sawi.
Hemi chungchanga The Zozam Times zawhna chhangin AMVCA president ni lai mek, Lalremsangi Fanai chuan tuna hruaitu thar an inruat chungchang hi executive committee-in a hriatpui lo a, MNF VC member-ten an duh thuin chanvo an lo inpe ve ringawt tih a sawi a, “Kan Whatsapp Group-ah heng mite hi hruaitu thar an ni tiin an rawn post a, kan bangbo khawp a, MNF VC ni ve loten kan pawm thei lo,” a ti.
Lalremsangi Fanai chuan, “AMVCA hruaitu thar nia inchhalte hian sorkar pawmpuina an neih thute an sawi a, kan pawl inthlan chungchangah hian sorkar hi a inrawlh ngai lo a, sorkar pawmpuina pawh a ngai lo,” a ti a, party dang VC-ten ro an rel hlauhna avanga sorkarna fawng an chelhna hmachhuana pawl hruaitu an inruat thar ringawt chu dik lo an tih thu a sawi.
MNF VC member thenkhat ruahmana angin AMVCA hruaitu thar inruat mah se AMVCA-a member ni mek mi thahnem tak chuan hruaitu tur thlan chhuah ngei an la tum tih Lalremsangi Fanai chuan a sawi a, “Hruaitu ni laite hian hruaitu nih leh hi kan châk a ni lo a, hetia pawl kalphung pela an kal hi kan duh lo a, district tin VC aiawhten ram pum huap hruaitu tur hi kan thlang ngei dawn,” a ti.
The Zozam Times-in AMVCA hruaitu dang a kawmte pawhin hetianga MNF mi leh sate hruaitu nihtir tuma pawl kalphung pela an che chu hriatthiam har an tih thu an sawi a, hetianga MNF party-in ruahmanna an siam chhan nia lang chu AMVCA hruaitute hian sorkar kal dan dik lo tawkte an sawi hi an ngaih theih loh vanga hetianga hma la nia an ngaih thute an sawi hlawm a ni.