India khawthlang lam, Maharashtra-a police-te chuan a u, a farnu nau pai chu a lu a tansak nia puhin an man.
Hmeichhia hi kum 19 mi a ni a, a chhungte phalna lovin pasal a nei niin police thuneitute chuan an sawi.
A nutapa leh a nu tana thingpui a siam lai chu a nutapa hian favah hmangin a bei ta nia sawi a ni a. A beitu leh a nu hi police kutah an inpe nghal.
Police chuan hmeichhe lu nen hian an in-selfie bawk niin an insawi.
A thahtua an puh hi kum 18 a la tling lo niin a dan hre mi chuan a sawi a, hei vang hian remand home-ah dah nghal a ni a. Mahse, police thuneitu pakhat chuan lehkha chiang taka puitlinga chhiar theih a la ni lo tih fiahna a awm lo a nih chuan an kutah an lak dawn tho thu a sawi a. A nu erawh police-in an kawl thung.
BBC Marathi chuan he thil hi Aurangabad district-a thleng niin a tar lang.
An thah tak hi a pasal nen an inngaihzawn lai atangin a chhungten an duh lo hle a; mahse, June thla khan an tlan dun a. An pahnih hian hnam (caste) thuhmun an ni a; mahse, a chhungte hian an chhungkaw aia an retheih avangin an duh lo.
Pasal a neih hnuah hian a chhungte hi a bepawp leh tawh miah lo va; mahse, thah a nih hma karah khan a nu chuan a tlawh a. Heta tang hian an fanu chuan nau a pai tih pawh a hria niin police chuan an sawi.
India-ah hian an chhungten inngaihzawnna leh inneihna an duhpui loh avangin kum tin mi tam tak thah an ni thin niin hetiang titawp tura beitute chuan an sawi.
Hetianga tualthahna hi ‘honour killing’ tiin an sawi mai thin a. India ram hmun hrang hrangah hnam hrang hrangten nu leh pa leh chhungte phalsak loh nupui pasal neih duh lohna hi nasa takin an la kalpui a ni.
March thla pawh khan hmar lam, Uttar Pradesh-a police-te chuan pa pakhat chu a fanu lu a tansak avangin an lo man tawh a. Police-in a thil sawi lai video an lakah chuan a phal loh nen an inkawp niin a sawi.