- Er. Chhungpuia Renthlei
Keini mizo kristian te kut ni vang thla ropui ber leh nghahhlelh ber ni bawk, kum tina ran thisen luantir meuha ruaipui nena kan lawm thin, MASI a rawn inher chhuah apianga kan lengkhawm hla pui, “U Ama ilo fak ang” tih hla hi zet hi masi a va ti masi thin kher em!
He hla hi Latin hla (Hymns) Adestefideles atanga lo piang chhuak a ni. Adestefideles tih hi English chuan Come, faithful ones tihna a ni. “Ringtu rinawm te u, Lo kal rawh u” tihna a ni. Keini chuan , “Ringtu zawng zawngte u, hlimin leh lawm takin..” tiin kan lampui mup mup thung. Tuna kan sak dan ber hi chu original version ni tawh lovin, kum zabi 18 na hun laia mi hrang hrang te kutchhuak remkhawm a ni tiin an sawi.
He hla hi a tirah chuan Isua pian thu Berampu ten van angel zaipawl an ngaithlak hnu a Lalthar chibai buk tura Bethlehem a an kal thu te Bible in a tarlan dan zulzuia phuah a ni. Tunah erawh chuan berampu te angin Lal piang chibai buk turin Bethlehemah kal theilo mahila, kan thinlung Bethlehem lama hawi tira, min chhandam tura lo piang Isua Krista chawimawi leh chibai buk theuh tura min sawmna ani ber e.
He hla hi Kum 1751 khan Adeste Fideles tih thupui hmangin Latin tawnga ziah a ni. Kum zabi 18 na vel khan Douai College, France hmar lamah hmuh chhuah a ni. Latin tawnga phuahtu hi chiang taka hriat a nilo mase, Adeste Fidelis Author, Dom John Stéphan-a chhui danah chuan he hla hi Kum 1740- 1743 vela France rama English musician lar tak leh British Roman Catholic school a music zirtirtu hmingthang tak John Francis Wade (1711-86) an Latin tawnga a phuah leh a thluk (Music) pawh a siam a nih thun a sawi.
Kum 1841 khan Oxford Movement laia Latin Hla (Hymns) English a letlingtu lar tak English Catholic puithiam Frederick Oakeley (1802-1880) an English in nalh takin a letling a, hei hi tunlaia English version a an sak dan ber hi a ni nghe nghe. Rev. F.W. Savidge (1862 –1935) ,Sap upa kan tih khan mizo tawngin a letling a, hla thupuiah “Ringtu zawng zawngte u” tiin an dah a. hla chang tawpa “Amah ilo fak ang u” vawi thum sak nawn lai tak hi a fuh mai mai a sin aw !
Sap ho ten “O come, let us adore Him” an tih laia U” hi abul ah nge a tawpah a awm tih hriat theih hauh lova “U Amah ilo fak ang” ti a kan sa daih mai te hi a MASI bik tlat asin. Latin hote phei chuan “Venite adoremus, venite adoremus” an ti daih phei hi chu MASI hmel loh zawk daih zu nia!
Hei mai a la ni lo, chang tin tlar tawp thumna “Amah en turin Van tirhkoh te Lal hi”,” Fakin awm rawh se, Pathian kan Lalber hi” tih leh “Kan tuar ai i tuar Pathian fa i ni si a!” tih atanga “Amah ilo fak ang ” tih kan sak zawm lai te hi a va fuh kher ve le! “U Amah ilo fak ang” tih mai bakah “Hi Amah ilo fak ang”, “Si Amah ilo fak ang” ti a kan han sa dup dup mai te hian Bethlehem lamah kan ngaihtuahna min phur liam vawng vawng mai a ni ber e.
MASI a rawn inherchhuah apianga Biak Inah leh lenkhawmna a kan hlimpui ber hla “U Amah ilo fak ang” tih zet hi zawng vawiin thlenga Masi ti masi tu ber a la ni zel anih hi.