Kum thum liam ta chhung khan China leh Bhutan nena inrina kânin a rukin India-ah tumah an awm lo niin Union Home Minister of State Nisith Pramanik chuan Thawhlehnia Lok Sabha-a zawhna a chhannaah a sawi.
Chirag Paswan chuan kum thum liam ta chhungin India leh a thenawm ramte inrina kâna a ruka India lut engzat nge awm tih leh sorkarin engtin nge hma a lak tih a zawhna a chhannaah minister hian a sawi.
Ziaka zawhna chhannaah hian Pramanik chuan, “Pakistan ramri kân mi 128, Bangladesh nena inrina kân mi 1,787, Nepal nena inrina kân mi 25, Myanmar nena inrina kân mi 133 an awm a. China leh Bhutan ramri kân ru erawh an awm lo,” a ti.
“Heng ramri kân rute hi ramri vengtu sipaiten sorkar agency leh an huam chhunga state sorkar nen lo hmachhawnin dan awm sa angin an chungthu an ngaihtuah thin,” a ti.
Pramanik chuan sorkarin thenawm rama mihring cheng zat atanga chhuta ramri kâna India-a lut an punna hmunah te a veng tur leh a viltu tur, special monitoring team din a rawt mek tih a sawi a. Sorkar agency, ramri vengtute pawh telin hma lak dan dap a nih thu a sawi.
Minister-in parliament rorel inkhawma zawhna a chhannaah chuan ramri kâna a ruka India luh tum dan nan hian kawng hrang hranga hma lak a ni.
International Border an tihah ramri vengtu sipai a dah vek a, ramri hungin zana a êntu tur (floodlight) a dah vek a, ramri-ah patrol reng a ni a, ramri hmun hrang hrangah duty-na hmun dah a ni a, a rinhlelhawm deuh laiah phei chuan Border Out Post (BOP) siam niin ramri vela tei chi – Hand Held Thermal Imager (HHTI), Night Vision Device (NVD) leh a dangte hmanga vil reng a ni.
Ramri vengtute hi Twin telescope, Unmanned Aerial Vehicle?(UAV), Long Range Reconnaissance & Observation System (LORROS), Battle Field Surveillance Radar (BFSR), Closed-circuit Television (CCTV)/Pan Tilted & Zoom (PTZ) camera, IR Sensor leh command & control system-a thuam infrared alarm, ramri kan an awma lo hre thei khawl, mi hnu chhui thiam, a ralti zual laia lei verh hai chhuak thei, lawngleng, duhna hmuna BOP sawn theih leh hmanraw dang dang hmanga ven a ni.