Lo neituten lungawi lohna kalpui titawp dawn ta


Samyukt Kisan Morcha chuan sorkarin lo neihna lam kaihhnawih dan a siam pathum, farm law tia an sawi dodalna an lantir chu an titawp dawn ta nge nge nia sawi a ni a, Ningani hian thutlukna tak chu an siam rin a ni.
Thawhlehni tlai khan India chanchinbu hrang hrangte chuan sorkar laipuiin lo neitu pawl inzawm khawm, Samyukta Kisan Morcha hnuaia member panga awmna committee-ah lo neitute thil phut hrang hrang a chin felna turte a thawn niin an tar lang hlawm.
Lo neitu pawl hian an hruaitu lawk tak takte nen Delhi ramri, Singhu-ah sorkarin an lungawina theihna tura ruahmanna a siamte hi Thawhlehni khan an sawiho niin an tar lang bawk.
Lo neituten dan thar dodalna an lantira a huaihawttu ber, an pawl hrang hrang inzawm khawmna pawl, SKM hian Inrinni khan anmahni aiawhtu tur mi panga thlang chhuakin inremna a awm theihna tura sorkarin committee-a tel turin an ti a. He committee-a an aiawhte hian lo neitu lungawi lote zawng zawng ai an awh a ni.
Committee hi sorkar laipuiin lo neitute thil phut hrang hrang ching fel tura a siam a ni a. Sorkar laipui hian lo neitute thil phut lian ber, farm law pathumte erawh a lo sawi lawk tawh angin a hnuk kir a, parliament-ah pawh pawm a ni tawh.
Farm law pathumte chu hnuh kir ni tawh mah se lo neitute hian thil phut dang dang an la nei a, hengte hi an lungawina khawpa sorkarin a tihfel hma chuan kum khat chuang zet dodalna lantirna an kalpui chu tawpsan an tum lo a ni.
Lo neitute hian dan ang taka MSP tha tawk tak neih an duh a, an thar chhuah zawng zawng huap bakah a sawngbwalna huap vekin, lo neitu zawng zawngin he hamthatna hi an chan theihna tura dana siam an phut a. MSP an tih hi lo neituten an thlai tharte miin an leisak turah an ngamna zat mai ni lo, sorkarin a aia hniam hralh theih loh tura a man bi a tuksak a ni.
SKM leh sorkar aiawhte inbiaknaah chuan sorkar hian dan siam tur a duan tawh, Electricity Amendments Bill, 2020/2021 chu hnuh kir a tiam a; mahse, hei hi parliament-a rel tur zingah a la tel reng a, tuna tihkhawtlai rih mai a ni a, lo neitute hian hlih tak tak an ngiat.
Lo neitute hi an thlai sengna ro an hal khuk nasat thin avangin Delhi leh a chhehvel boruak tibawlhhlawhtua puh an ni a, hrem theih an ni a. SKM chuan Commission for Air Quality Management in the National Capital Region & Adjoining Areas Act 2021-a section 15 chu paih an phut a, hei hi lo an hal khute hrem theihna inziahna a ni.
Nikum June atang khan farm law dodal hian Delhi-ah Haryana, Chandigarh, Uttar Pradesh leh state dang dang atangin lo neitu an kal khawm a. Lungawi lohna an lantirnaah thubuai pawh siamsak an awm nual a, hengte hi hlih vek an phut.
Uttar Pradesh-a Lakhimpur-a lo neituten duh lohna an lantirnaa thil thleng avangin Union Minister of State Ajay Misra chu bân leh man an phut.
Lo neitute hian Delhi ramri, Singhu-ah farm law duh loh lantira an awm khawm chhunga lo neitu thi nia an sawi mi 700-te hriat rengna siam an phut a, zangnadawmna pek an phut bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427