Pathianni thleng awh tur Mizoram Synod Inkhawmpui vawi 98-na chu nimin khan Republic Veng kohhran biak inah tan a ni a. December 1 atang khan Synod hnuaia board leh committee hrang hrangte chu an thukhawm tawh thung.
Vawiinah Synod rorel tan a ni ang a, Inrinni thleng a awh ang. Pathianni chawhmaah Pastor nemngheh leh Pro Pastor dahngheh inkhawm buatsaih a ni ang. Chawhnu lamah sunna inkhawm buatsaih a ni ang a, Synod inkhawmpui chhung hian zan lam inkhawm a awm dawn loh avangin chawhnu inkhawmah hian moderator kalchhuak, Rev. Dr C Lalhlira’n valedictory sermon a sawi nghal dawn a ni.
Kumina Synod puipa turte chu – Moderator Rev Dr Vanlalnghaka Ralte, Secretaries Upa Lalrinmuana (Sr), Rev ZD Lalhmachhuana (Jr), Finance officers Rev B Sangthanga, Executive secretary Rev Lalramliana Pachuau, Statistician Upa Lalthianghlima; Executive secretaries Rev Lianhmingthanga Sailo (Sr) leh Rev K Lalrinmawia te an ni.
Synod inkhawmpui hi kum 2010 atang khan bialin thleng tanin, tun tumah hian Republic Veng Pastor Bialin a thleng a. Hri leng vangin palai pawh 777-ah tihtlem a ni bawk.