Union Civil Aviation Minister Jyotiraditya M Scindia-a’n hmarchhak state dang atanga civil aviation tihchangtlunna tur proposal an dawn tam viau laiin, Mizoram atangin proposal an dawng ve lo nia sawiin, mak a tih thu a sawi.
BJP Mizoram state president Vanlalhmuaka’n nimin khan union minister a hmuh thu leh he thu hi a lo hrilh thu a sawi a. Mizoram chief minister hnenah a rang lama ministry-a Mizorama civil aviation tihchangtlunna tur proposal thehlut tura thurawn pe turin a lo hrilh niin a sawi.
Vanlalhmuaka chuan hmarchhak state dangte chuan regional connectivity scheme hnuaiah an state-a airport siam belhna tur te, cargo complex siamna tur proposal te ministry-ah an thehlut hlawm tih minister chuan a lo hrilh niin a sawi a. Minister chu Mizoram tlawha civil aviation lama a mamawhte leh a tihchangtlun dan turte a hmun ngeia ensak tura a sawm thu a sawi bawk.
BJP Mizoram state president chuan Lengpui Airport tihchangtluna cargo complex (perishable leh non-perishable item) changtlung neih dan tur te, Kaladan Multi-Modal project avanga Mizoram chhim lama airport neih ngei a tul thu te, Mizorama helicopter tam zawk thlawhtir a tul thu te, Mualpui Helipad pawh helicopter tam zawkin an hman theih tura heliport atana buatsaih a tul thu te minister hnenah chuan a thlen niin a sawi a. A thu thlente chu a lo ngaih pawimawh tur thuin a lo chhang niin a sawi bawk a ni.