- PL Liandinga
Mizoram Chief Minister chuan sorkar laipui dawrin Bamboo Link Road (Mau phurh chhuahna tur kawng) sialna tur a dil thu leh a beiseiawm thu a rawn hawn ni awm tak a ni a. Eng tak anpui i maw le?
Tuna kan sorkar hian an sorkar hma khan an thiltih tur chu an duang fel vek tawh a, an sorkar veleh engkim mai a bawhin an bawh chat chat ang a, an ri nghal phat phat ang (bawng insi angin warm-up awm lovin) an ti a. Tunah kum thum an lo sorkar ta a, kum hnih rorelna hun an la nei a. Tuna kan innghahna tur leh kan hotute thusawi len ber pakhat chu, “DPR chuti zah man kan siam,” tih thu vel a la ni ta laih laih a. An sorkar atanga an ruahmanna leh an beihna avanga hmasawnna kawnga thil thleng awm chhun chu phul lem phah deuh mai hi niin a lang.
Mizoram sorkar hmalakna avangin kan leihnuaia hriak (oil) te chu kan laichhuak lova, buh leh bala intodelhna turin hma thar sawi tham kan la lo a ni ang chu kan hmalakna sawi tur kan hre mai lova. Thingtlang pa taimain an tihdan pangngaia hlo an thlawhna lam atanga an buh thar, sorkar puihna leh tel vena awm hauh lova an thar that, a lawmna lama an telpui lai thla te kan hmu a. Chu chauh ni lovin thingtlang pain lo neihdan pangngaia lo an neih, kan pi leh pu te tihdana an zawhna lama Minister tel ve lai thla te kan hmu a. Chubaka kan hmuh theih chu buh lakna khawl a buh la lai te a ni.
Kan sorkar hmaa kan sawi nasat pawl tak thenkhat chu ei leh bar zawnna kawk lem lo, kawng chhawng te, traffic jam awm lohna te a ni a. Heng te hi chu tihlawhtlingin tihlawhtling lem lo mah se kan eizawnna tak tak nen chuti lutukin a inkaihhnawih lova. Kan eizawnna nena inkaihhnawih, ‘Buh leh bala intodelh’ chungchangah chuan thu thar engmah he kum thum chhung hian kan hre lo ti hial ila dawt chiang tak pawh niin a rinawm lo. Kan ‘economic molecule’ lah chu vawikhat sawiah a reh ta vang vang mai a. Kan economic kawihsapir ber lah kan la hre ta chuang lova. Kan ei leh bar khawih thei thil, mahse kan ei leh bar nena langtlang taka inhne si lo pakhat, kan ‘Financial airlock’ kha kan nam nung ta lo nge kan nam nung tawh pawh kan hre lo.
Kan ei leh bar min thunun theitu, kan mau chungchangah tunah hian ngaihdan tam tak a awm thei awm e. Horticulture Department Director chuan ram hectare zali chuangah mau kan phun a ti a. He mau hi kan Chief Minister-in intodelhna tura a sawi len tak pakhat zinga mi a ni nghe nghe. Mahse mipui lam tan chuan mau hmanga intodelh tura kan mau chin hi beisei ngam a har viau ang. Kan hmuh phak hnaivai, Lengpui leh Hmunpui khaw lamah chuan mau chinna hmun hian mipuite tan beiseina thar engmah a siam lo ngei niin a lang. Horticulture Director pawh hian, ‘Kan phun’ a ti mai a. A nung nge nung lo, a duah tha nge tha lo, a thang lian tha em tih engmah a sawi lova, beiseina tisang tur thu engmah a sawi belh lo.
Tuna kan Bamboo Link Road hian khawi khawi nge a chhun dawn a, eng mau phunna leh eng mau hmun nge a tlawh dawn kan hre rih lova. Mau chinna hmun hrang hrang kan han ngaihtuahin chungho tana chhawr theih tur chuan laih a nih dawn leh dawn loh pawh a hriat lohva. Mau chinna hmun hnuaiah kawng chu a kal dawn nge a chunglam daihah a kal dawn pawh a hriat lohva. Mau chin lohna hmunah te kan lai zel dawn nge dawn lo pawh a hriat loh.
Thil awm thei ve pakhat chu he Bamboo Link Road hi endik hleih theih loh, a hnu lamah pawh sawifiah ngai leh sawi zuzi theih tak mai angin a chhuak ve liau thei. Baffacos hmingpuin Central atangin sum tam tak mai Mizoram sorkarin a hai chhuak a, mahse a kal ralna lam chu a zuzi zo ta vek a tih theih ang. Khatiang sum tam tham kha chu Mizoram tan ro tling thil tam tak hnutchhiah theihna tur ni a a lan laiin mai chi lei nan te, eng eng atan emaw vaibelchhe tam tak kha kan tlak ral ta vek kha a ni a.
Tuna kan Bamboo Link Road pawh hi mipui tan chuan a lo chhuak tih hriat mang loh hian khawilai lai emaw ramhnuaiah kawng a insial ve rik riak ang a, a ziak lamah chuan mawihnai angreng tak, a bill sang tak si hian kan hmang zo vek ang a. Mipui tana han chhawr tak tak dawnin thiam tak maiin, “Fur ruahin a nan chhia a, chuti khati….” tiin kan sawi leh hliam hliam ang a. Chhawr tur awm mang lovin tuten emaw pawisa an rut tawk tawk ang a, a zo der ang tih a hlauhawm khawp mai — thil awm tawh dan han enin.
Bamboo Link Road han tih te hi Central sorkar hotute bengah chuan a tla fuh phian thei a, mahse a tak tak ramah chuan mipui hian chuti takin kan chhawr tangkai lo thei. Sorkarna fawng chelhtute lam tan chuan, ‘Cheng chuti zat kan dawng,’ tih theih ve si, mahse mipui leh ram tana hnemhnanna awm lo thil a ni ve thei hle a ni.