Zan lam curfew hi a la tul rih zel dawnin a lang
Sawiselna nasa hle mah se, sorkar in zan curfew a la puan chhunzawm zel a, kawng tam tak ngaihtuah chuan kan mamawh leh la tih chhunzawm zel chi ni pawhin a lang a ni. Sualna leh thubuai lian tham thleng tam tak a tlem phah a, lungkham nei lek lova two wheeler tlan ri bengchheng hriat tur awm ta mang lo ringawt pawh hi kawngpui hnaiha awm chhungkaw tam tak tan chuan thlamuanna tham a la ni pawhin a hriat bawk.
Aizawl SP C Lalruaia chuan zan lam curfew kalpui mek hian dan (law) bawhchhiatna kawngah nghawng a nei tih sawiin, “Mi sual veivak a tihtlem phah a, zana lirthei chetsualnate leh thubuai (case) lian pui pui, IPC-a major case ho hi chu a tlem phah a, hei hi zan curfew vangah pawh kan ngai deuh,” a ti a, hunpui boruak, mipui kan thawven deuh hun a lo ni chho dawn bawk nen, la chhunzawm zel chi pawh niin a lang a ni.
Sorkar in inkaihhruaina hrang hrang tichhuakin, inthlahdul deuh hret hret nimahse, zan lam mawlh hi la khauh deuh deuh chi niin a lang a, thalai thaza rual, RV leh Phunchawng pan ngawt pawh tam tham tak an ni bawk nen, sualna leh dan bawhchhiatna lamah kan lo fihlim phahna a nih phawt chuan la chhunzawm zel hi chu a tih chi fo ang. Chutihrual erawh chuan, duty erawh tlema puitling chin deuh leh tlailam luhai nei lo ni thei se, mihring kan inang lo a, laklawk thil tak meuh meuh vanga curfew hun lo bawhchhia an awm a nih pawhin, rilru fim pu na na na chuan a thawidam dan an thiam bawk thin.
Aizawl SP hian Krismas leh kum thar vuakvetah dan leh thupek kenkawh kawngah hma la turin tun dinhmunah ruahmanna la siam chiah loh ni mah se, khawpui chhungah zan lam curfew duty hmun 24-a an indah mekte chu an awm tlang tur thu a sawi a. Hei bakah hian Aizawl luh leh chhuahna bik deuh hmun pariatah duty dah belh a, zan lama patrolling pawh an kalpui reng tur thu a sawite hi a tha a, dan leh thupek kengkawhtute hi an infuihthar sauh sauh pawh a ngai bawk awm e.