December 9, 2020 zana Dr Laltanpuia, Kulikawn Veng thih thua court-in thiam loh a chantir tawh, a nupui, Mary Zothansangi (39) chu tual a thah avangin dam chhung tang tur leh Rs. nuai 1 chawi turin a hrem a, MLP Act hmangin thla nga tang tur leh Rs. 4,000 chawi turin a hrem bawk.
He thubuai ngaihtuahtu, Aizawl Judicial District, Addl. District & Sessions Judge Dr HTC Lalrinchhana chuan he thubuaia thiam loh chantir, Mary Zothansangi’n tual a thah avanga Rs. nuai 1 a chawi tur chu a nei lo a nih chuan dam chhung bakah kum khat dang tang tura hrem a nih thu leh zu khuahkhirhna dan a bawhchhiat avanga a chawi tur Rs. 4,000 pawh a nei lo a nih chuan thla hnih dang tan belh tura hrem a nih thu a sawi.
Judge chuan Dr Laltanpuia chhungten pawikhawihtu chu an tute nu a nih avangin thi tura tih em chu tul an tih loh thu an ukil kaltlangin court-ah an thlen tih a sawi a. Mary Zothansangi ukil-ten an ngen angin MLP dan bawhchhiat avanga hremna pawh a tan tawh nena intlak thei tura tih a nih thu sawiin, “Zu khapna dan bawhchhiat avanga a tan hun chhung tur a tan hnuah dam chhung tang tura hrem a nihna a intan ang,” a ti.
Pawihkhawihna tuartu lam aiawh ukil-ten an dil angin Mizoram Victims of Crime Compensation Scheme, 2011 (as amended in 2016) tlawhchhanin District Legal Services Authority, Aizawl district chu Dr Laltanpuia fate pathum tan crime compensation pe tura tih a nih thu he thubuai ngaihtuahtu judge chuan a sawi a. Compensation pek zat tur chu a petu turin a ngaihtuah tur a nih thu a sawi thung.
Dr Laltanpuia thihna chungchang thubuaiah hian a nupui, Mary Zothansangi chu tualthattua puhin Thawhtanni khan IPC section 302 leh MLP Act section 6 (2) tlawhchhanin court-in thiam loh a lo chantir tawh a ni.
&&&&&