Congress party chuan Mizoram State Health Care Scheme (MSHCS) hnuaiah dam lo bill pek theih loh cheng vaibelchhe eng emaw zat a awm mek avangin mipuiin harsatna an tawh nasat thu an sawi.
Nimina Aizawl Press Club-a thuthar thehdarhtute kawmin MPCC media chairman Dr Lallianchhunga chuan MNF sorkar hnuaiah dam lo bill pek theih loh avangin mipuiin harsatna an tawk nasa niin a sawi a. “He harsatna hian MNF sorkar sawngnawizia leh sum leh pai enkawlna kawnga an hlawhchham zia a tarlang chiang hle a, bill lak theih loh vangin hunpui Krismas dawnah chhungkaw sang tam tak an buai mek a ni,” a ti.
Tuna hman mek MSHCS chu April 1, 2008 khan Rs vbc 50-in MNF sorkarin bul tanin, khatih laia Health Minister R Tlanghmingthanga fanu thawhna, Baja Allianz-ah cheng vaibelchhe tam tak chu ‘Fortune plus’ policy hnuaiah a hming tumtu, health minister fate hlawkna turin ‘Annual Premium’ anga dahsak an nih avangin MSHCS kha a nih tur angin a kal thei lo niin Dr Lallianchhunga’n a sawi.
MPCC media chairman chuan December, 2008-a Congress ministry thar a pian pawh khan bithliah neia Bajaj Allianz-a pawisa hi dah a nih avangin MSHCS kalphung tha lo kha siam rem lawk theih a nih loh avangin, kum 2010-2011 chhunga bill tang chu bill thehluh zawng zawng atanga zaa 35 a tling hial niin a sawi bawk.
Congress sorkar khan mipui harsatna sukiang turin MSHCS siam thain, Asian Development Bank atanga sum a hmuh Rs vbc 117.80 leh Health care sum hman bang, a vaiin Rs vbc 149.6 chu kum 2010-11 atangin MSHCS sum bawmpui atan dah a nih thu a sawi a. “Hemi sum peipun hna hi Finance Department kutah dahin, anni lamin bank hrang hrang pali-ah a pung tam turin investment an ti a, harsatna awm loin bill pek tur atana tehna hrang hranga tlingte chu a pung atang hian pek an ni ta zel a ni,” Dr Lallianchhunga’n a ti.
Kum 2018-a MNF sorkar thar a lo pian tirh khan Congress-in Healthcare a kalpui aia tha zawka kalpui an tum thu aupui nasa hle mah se, Congress sorkar in MSHCS Corpus Fund a lo siam aia tha kalphung dang MNF sorkar hian siam belh a nei meuh lo niin a sawi a. Kum 2018 a sorkar a inthlak khan Health care-ah hian cheng vbch 155 vel a tling khawm hman nia sawiin, Corpus Fund hi Finance Deptt in bank pali-a investment a tih vangin Rs vbc 220 vel, MNF sorkarin Corpus Fund a Rs vbc 70 a dah belh nen a tling khawm tawh niin a sawi bawk.
Dr. Lallianchhung chuan Health Care Corpus Fund pung atanga damlo bill hi pek tur a nih avangin MNF sorkarin ruahmanna an siam leh sum dah a inmil thei ta lo tih a sawi a. Budget-ah pawisa an dah belh bawk si loh avangin an talbuai ta tih sawiin, “Bill tang tam tak a siam phah ta a, Health Care bill tang Rs vbc 40 vel a awm phah ta a, chu chu chhungkaw tam takin an tuar ta a ni,” a ti.
ZPM Legislature Party-in Dr. Vanlalthlana, MLA hminga Press Statement an tihchhuahah Congress sorkar tharin Healthcare a ngaihsak zui lutuk loh avang khan a nih tur ang a ni pha ta meuh lo tia an han sawi chu mak an tih thu sawiin, Dr. Lallianchhunga chuan, “Congress sorkar kha health insurance lamah a thawk tha hle a, nasa takin Healthcare system a siamtha a, National Family Health Survey 2015-2016 chuan India hmarchhakah Mizoram hi Health Insurance lama thawk tha berah a lo puang tawh a ni,” a ti bawk.