India hmarchhaka sipaiten thuneihna sang tak an neih theihna dan hman mek, Armed Forces Special Powers Act (AFSPA) hlih duhna thawm chu tun hnaia venhim hna thawktuten Nagaland civil mi 13 an thah hnuah a ring sawt hle.
Ningani pawh khan All Assam Students’ Union (AASU) chuan Dighalipukhuri, Guwahati-ah AFSPA hlih duhna an lantir.
AASU Chief Advisor Samujjal Bhattacharya chuan, “Nagaland-a inthahna thlenga mawhphurtute hi na taka hremna pek tur a ni,” a ti.
“AFSPA hi hmarchhak atangin hlih ngei tur a ni,” a ti bawk.
Sorkar laipui chuan hmarchhak chu a ngaihthah hle tih a sawi bawk.
“Sorkar laipui hian Kolkata chhak lam pawh hi India a ni tih hre rawh se, hei hi hmarchhak a ni a. Nagaland mite beih an ni hi Assam mite beihna tho a ni,” tiin AASU chuan an sawi.
Tar lan tawh thin angin Inrinni kal ta tlaiah khan sipaite chuan Myanmar nena inrina bul lawk, Nagaland-a Mon district-ah helho beih an tumna lamah lungalhthei khura thawk, truck-a chuangte chu hai palhin an kap a, mi 13 an kap hlum.
He thil thleng hriaa a bul hnai khaw mipui thinrim chuan sipai camp chu bei zuiin buaina chhuakah hian mi dang pakhat a thi leh a ni.
Union Home Minister Amit Shah chuan he thil thleng hi sipaiten mi an hai palh vang liau liau a nih thu sawiin thla khat chhungin chhui chhuah turin a ti.