Rajya Sabha MP K Vanlalvena’n Mizorama oil leh gas zawn hnathawktu, Oil & Natural Gas Corporation (ONGC)-in Meidum-ah gas 2.28 billion cubic metre a awm turah an ngai tih sawiin, “Hei hi sorkar laipui tanpuinaa la chhuak tura hmalak a ni,” a ti.
K Vanlalvena chuan Kolasib district-a Meidum khuaah ONGC-in natural gas an hmuchhuak ngei a ni tih hriat a nih thu The Zozam Times hrilhin, ONGC hian natural gas chu 2.28 billion cubic metre a awm tura an ngaih thu a sawi a. “India ram puma hralh atan chuan tlem viau mah se, Mizoram tan chuan chhenfakawm tham a ni dawn,” a ti.
Meiduma natural gas awm chu la chhuaka Mizorama hman theih tura hmalaksak turin sorkar laipui hotute a ngen tih K Vanlalvena chuan The Zozam Times a hrilh a. Assam-in an state-a gas awmte company-te nen tanghova lai chhuaka an state-a an hman thu sawiin, hemi kawnga Assam hmalakna dana hma la turin Mizoram Gas Corporation din thuai a tul thu a sawi.
Rajya Sabha MP chuan duthusamin hma lak chak theih loh mah se, Meiduma gas awm lai chhuak tura theihtawpa tan lak a nih thu a sawi a. Mizorama hman tura Meiduma gas awmte laih chhuah chu sorkar laipui hotute pawhin an phurpui thu sawiin, tun hnaia Chief Minister Zoramthanga Delhi kal pawhin a changtu minister a sawipui thu leh union petroleum & natural gas minister pawhin gas laih chhuah a nih theihna tura puih a tum thua a chhan thu a sawi bawk.