Nagaland Chief Minister Neiphiu Rio chuan December 4-a Mon district, Oting-a sipaiten civil mi an thahna thleng khan Armed Forces (Special Power) Act, (AFSPA), 1958 hman sualna a nih thu a sawi.
Rio chuan he dan hi mihring dikna chanvo palzutna a nih thu leh Naga-ten hun rei tak an lo do tawh a nih thu a sawi.
Sipai chetna avanga thi mi 14 chhungte a tawrhpui thu a sawi rualin, mipuite chu chak leh huai taka awm chunga phuba la lo turin a chah.
“Tun hi tharum thawhna tel lova tharum thawhna hnehna hun a ni,” a ti.
An state mipuite chu tharum thawhna dah thain AFSPA hi ramin a mamawh lo a ni tih lantir turin a chah a. Khawtlangin engtikah mah hah taka muanna thawh chhuah tihchhiat chu a pawm ngai dawn lo tih a sawi bawk.
Rio chuan India leh khawvelin Naga mite chu ram buaia mite anga an hriat loh a beisei thu leh muanna duh em em anga an hriat a beisei tih a sawi.
Chief minister hlui, Naga People’s Front Legislature Party leader TR Zeliang pawhin AFSPA chu natna leh tawrhna thlentu mai a nih thu leh hlih ngei a phut thu a sawi ve bawk.
Pawisawi lo civil mite thah chu eng ang maha ngaihdam theih a nih loh thu sawiin, sorkar chu a titute chungah dimna leh hmaih nei lovin dikna hlen chhuak turin a ti.
Zeliang-a chuan Naga-te chu Indo-Naga politics buaiah remna an neih tep laiin Oting-a hetiang thil a thleng hi a pawi thu a sawi.
Oting-a thil thleng chungchangah hian sipaiten an kah hlum tak hnam, Konyak Union Kohima president, H Angnyei Konyak pawhin hetiang hi ram chhunga thleng turin tumahin an duh lo tih a sawi.
Konyak chuan a tuartute chu thinlung takin an tawrhpui tih a sawi bawk.
&&&&