Kumin November ni 18-a North-East MSME Conclave, Guwahati-neih tuma Union minister for MSME Narayan Rane-a’n thurawn a pek bawhzuiin Commerce & Industries minister Dr R. Lalthangliana’n hrilengin Mizorama micro enterprises enkawltu harsatna tawk chhungkaw 50000 khaichhuahna tur proposal for special economic ppackage chungchangah sorkar laipuia a dawr.
Commerce & Industries minister chuan union minister for MSME bakah, DoNER minister G Kishan Reddy leh union finance secretary Dr TV Somanathan te hmuin, Mizoram-a Industry te dinhmun leh COVID19 vanga industrial unit ten harsatna an tawh hrang hrang te a thlen a. Central sorkar atanga tanpuina pek an nih loh chuan industrial unit tam tak chu hnathawk chhunzawm thei lova khar hmabak an ni tih hrilhin, micro enterprise te chhanchhuahna tur proposal for special eeconomic package an thehluh tawh chu tihhlawhtlinsak turin a ngen.
Mizorama industrial unit zinga za-a 97.36 chu micro enterprises an nih thu Dr R Lalthangliana chuan sorkar laipui hotute chu hrilhin, an dinhmun a that chuan Mizoram economy pawh a mumal theih phah tur thu a hrilh a. MSME guidelines nen inmillo deuh pawh ni se, a pawimawhzia hriatsaka tihhlawhtlinsak turin a ngen.
Sorkar laipuia mipawimawhte chuan commerce & Industries minister thu thlen te chu uluk taka an lo zirchian tur thu leh a hlawhtlin theihna tura theihtawpa hmalak an tum thu an sawi niin sorkar thuchhuahin a tarlang.
Union Ayush minister Sarbananda Sonowal pawh hmuin, Dr R Lalthangliana chuan Mizoram hmun hrang hranga AYUSH hospital sakna tura DPR an thehluh tawh chungchang a sawipui a, Union minister chuan a lo bawhzuisak tur thuin a lo chhang a. NITI Aayog member (Health) Dr VK Paul pawh hmuin, Civil hospital, Aizawl-a dah tur Magnetic resonance imaging (MRI) an mamawhna a thlen chu Boeing company-in an tihsak theih tur thu Dr VK Paul chuan a lo hrilh a, Boeing India Pvt. Ltd. chief of staff Praveena Yagnambhat pawhin thla 6 chhunga tihfel vek theih an inbeisei thu a sawi niin sorkar thuchhuah chuan a tarlang.
Dr R Lalthangliana chuan Delhi-a Canada high commission (Embassy) pawh tlawhin, an hotu pawimawhte a kawm a. Mizorama COVID19 leng mek dinhmun leh Canada-in Mizoram a puih theihna tur awm te an sawiho a. Kumthar tir lamah Mizoram tlawh an tum thu an sawi niin sorkar thuchhuah chuan a tarlang bawk.