India chief of defence staff (CDS) hmasa ber, General Bipin Rawat-a chu Zirtawpni khan Delhi Cantonment-a Brar Square crematorium-ah a thlahna hnuhnung neih a ni ta.
Gen Rawat-a hi a nupui, Madhulika leh sipai 11-te nen Tamil Nadu-a Niligiris district-ah, Coonoor khawpui bul lawkah Nilaini chhun khan chopper tlaah an thi.
CDS thlahna leh zahna lantir nan laipui vawi 17 kah a ni a. A vui/hal ramna inkhawmah hian sipai 800 chuang an tel a. A thlahna hnuhnung atan Last Post & Rouse chu sipai chi thuma tawtawrawt ham thiamten tumin a halna mei hi a fanute pahnih, Kritika leh Tarini chuan an dep kai a ni.
Hal a nih hma hian Defence Minister Rajnath Singh chuan halna hmunah hian zahna a hlan a. An chhungte dang pawhin a fanute hun hmang hi an tawiawm bawk.
An nupa ruang hi an chenna in atangin laipui hnuhna hmangin halna tur hmun panpui an ni a, kalkawngah hian a uituten pangparin an lo vawm nasa hle a. Halna tur hmun an pan hma hian a ruang hi thlah duhte tan an inah hian chawhnu dar 2:00 thleng dah a ni bawk.
Hal ralna inkhawmah hian sipaite leh defence minister bakah Law Minister Kiren Rijiju, India-a France ram palai Emmanuel Lenain leh British High Commissioner Alex Ellis te pawh an tel.
Sri Lanka, Bhutan, Nepal leh Bangladesh-a sipai hotu lawkten CDS hun hnuhnung hi an hmanpui bawk.
An chenna ina dah an nih lai hian politician, ram dang palai leh mi langsar tak takten Gen Rawat leh a nupui hi thlahna pangpar dahin an thlah hlawm.
Union minister zingah Amit Shah, Nirmala Sitharaman, Mansukh Mandaviya, Smriti Irani, Narendra Singh Tomar leh Sarbananda Sonowal te chu a chenna ina pangpar dah zingah an tel.
Delhi Chief Minister Arvind Kejriwal, Uttarakhand Chief Minister Pushkar Singh Dhami, Congress hruaitu zingah Rahul Gandhi, Mallikarjun Kharge leh Harish Singh Rawat, BJP chief JP Nadda leh DMK hruaitu atangin A Raja leh Kanimozhi te pawhin thlahna pangpar an dah bawk.
Army chuan chopper chetsualna thleng zinga thi hi mi pathum – Gen Rawat, a nupui leh Brigadier Lidder te chauh an puang a. Brigadier Lidder-a hi Zirtawpni chawhma khan sipai chawimawina famkim nen thlah liam a ni bawk.