Nikum September thla khan sorkar laipuia Ministry of Home Affairs (MHA)-in Myanmar nena insumdawn tawnna leh inkalpawhna kawngka hawng tawh mah se, tun thlengin dan pangngai anga intlawhpawh hleihtheih a la ni lo.
The Zozam Times zawhna chhangin Champhai Bawrhsap Maria CT Zuali chuan, “Hripui leng avangin border trade hi khar reng a nih hnuah MHA chuan a hawng tawh a. Mahse, Myanmar atanga raltlan avangte leh hripui leng avangten dan pangngai angin kan la intlawhpawh ngam chiah lo,” a ti.
“Ram pahnihte inremna angin Myanmar leh India ram chhung km 16 bial ve ve duh duha passport tel lova intlawhpawh theihna (free movement regime) kalpui thei tawh tura ngaiin kan inbuatsaih a. Mahse, chhan hrang hrang avangin khi lam an inkhar laiin kan inhawng a, Mizoram kan inkar a, anni lam an inhawng leh a. Kan inhlau tawn a ni ber,” Maria CT Zuali chuan a ti.
Mizoram lam hi Zokhawtharah raltlan an rawn luh bakah African Swine Fever (ASF) leh hripui leng avanga containment area leh infected area-ah te puan a nih vangte khan dan pangngai angin border trade kalpui hleih theih a nih loh thu a sawi.
Champhai bawrhsap chuan, “Tunah hian kawngka hi hawng leh tawh ila kan ti a. Mahse, custom leh Assam Rifles nen sawiho a la ngai ang,” a ti bawk.
Hripui leng avanga Mizorama inkharkhip bur lai pawha Myanmar atanga ei theih hmawmsawm lo lut reng chungchang zawhna chhangin, “Kan inkhuahkhirh viau lai pawh khan, a sir velah luhna hi a tam tho a. Inven sen tak tak a ni chuang lo,” a ti.
Myanmar atanga raltlan chungchang sawiin, “Danglam reng a ni a. A changin an pung leh hluai thin,” a ti a. Tunah hian Human Rights & Law Network leh activist thenkhatten raltlante dahkhawmna hmun tur Saitual-ah detention centre siam a rawt tan niin a sawi bawk.