Dan pangngai anga India leh ram dang inthlawhpawhna chu January 31, 2022 hma chuan chhunzawm a ni dawn rih lo tih Directorate General of Civil Aviation chuan Ningani khan a sawi.
Ram dang nena thlawhna hmanga intlawhpawh tawn hi December 15-ah chhunzawm tur a nih thu puan a nih hnu lawkah kar hmasa khan COVID-19 variant thar, Omicron avangin thulh leh a ni a. DGCA-in December 1-a thuchhuah a siamah chhunzawm hun tur chu ‘thil thleng zel dinhmun azira siam tur’ tiin a sawi a ni.
Ningani khan DGCA chuan thuchhuah thar siam lehin, “Thuneituin ram danga chhuak tur leh India-a lut tur mihring phur chi thlawhna chu January, 2022 zan dar 11:59 thleng atan chhunzawm rih lo tur,” a ti a. Air-bubble agreement a siampui sa ram 32-te nen erawh intlawhpawh reng tho tur a ni tih a sawi bawk.
Hetih lai hian Singgapore chu ‘hlauhthawnawm ram’ list atanga paih an ni ta bawk a. Hei vang hian he thliarkar khawpui atanga India-a lutte chu an thlen ruala RT-PCR hmanga endik leh ni sarih chhung inkhung zui tura tih an ngai tawh lo a ni.
&&&&&