Reporters Without Borders (RSF)-in report an siam thar berah chuan China chu ‘khawvela chanchinbumi man tam ber’ an ni a, tunah hian reporter 127 vel hren leh man lai an nei mek.
China hian khawvel pumah chanchinthar thehdarhna lam nekchepna thil chu rinphak baka nasain a kalpui niin an report-ah hian am tar lang.
China hian an ram mi leh ram dang chanchinbumite hi buaina thlentua puhin an man nasa em em thin niin a tar lang bawk.
RSF hian press mite khuahkhirh hi hripui leng hian a tizual niin an sawi bawk.
Wuhan khawpuiah ringawt pawh chanchinbumi leh online commentator mi 10 vel chu Covid-19 chungchanga an ram sorkar duh dan lo anga thil puan avangin man an ni.
An man zinga pakhat, dan hre mi thin, Zhang Zhan-i chu Wuhan-ah hian February, 2020 khan a mi cheng pakhatin online-a an khawpuia hri leng chungchang a ziah a chhiar hnu lawkah tlawh zui nghal a ni.
Wuhan a tlawhnaah hian khawlai leh damdawi in vela a thil hmuhte chu live-a tichhuakin a ziak bawk a. A thil hmuhte chu social media-ah nasa taka thehdarh a ni.
RSF-in phek 42-a chhah report an siamah hian Chinese thuneituten firfiaka chetna do beihpui thlak intia Uyghur chanchinbumi an man chungchang pawh a tar lang bawk.