Mexico-a truck chesualah mi 53 vel thi


Mexico chhim lam mihring phur truck chesualah mi 53 vel an thi a, tam takin hliam an tuar bawk niin thuneituten an sawi.
Central America lam atanga pem lut mi 100 chuang zet he truck, a hnunga hnuh nei chi (trailer)-ah hian chuangin Chiapas state-ah letin nasa takin a lum zui a ni.
Chhiatna thlenna hmun thlalak thehdarh atang chuan ruangte chu truck let bul velah hian an let phung a. Puan vara khuh ruang eng emaw zat dah khawm a ni bawk.
Mexico-a hetiang chetsualna thlengah chuan a la lian ber a ni a, mi 58 vel hliam tuar an awm a, thenkhat chu an na hle niin Chiapas civil protection agency hotupa, Luis Manuel Garcia chuan a sawi.
Thite hi mipa, hmeichhia leh naupang an ni a. Khawi ram mi nge an nih erawh hriat vek an la ni lo va; mahse, tual chhung thuneitute chuan Honduras leh Guatemala ram mite an ni hlawm niin an sawi.
Truck hi chak taka tlan niin Chiapas state khawpui, Tuxtla Gutiérrez panna kawngpui lian berah kawng kawiah mihring kalna tura siam lei a su a a, a let zui ta nia sawi a ni.
Chiapas hi Guatamala ram thenawm chiaha awm niin lehkha pawimawh nei kim lova pem tumten an kal kân thin ber khawpui a ni.
Central America ram atangte hian retheihna leh tharum thawhna nasa lutuk tlanchhiatsana Mexico kaltlanga United States luh tum mi tam tak kum tin an kal thin.
Mi tam tak chuan phal loh thil tawlh ru thinte hnenah pawisa pein an thil tawlh ruk karah, nunna atana hlauhawm tak takin, lirthei tawt leh truck-a an bungraw karah te an inphurhtir thin.
International Organization for Migration (IOM)-in a chhinchhiah dan chuan US-Mexico ramri hi ramri kânnaah chuan thihna thlen tamna ber a ni a. Kuminah ringawt pawh a kân tum mi 650 chuang an thi tawh a, IOM-in a chhihchhiah atanga a tam ber tum a ni tawh a ni.
Mexican President Andrés Manuel López Obrador chuan tun tuma chhiatna thleng hi ‘a rilru nat thlak tak zet’ tih a sawi a. A tilungchhe hle niin Twitter-ah a tar lang.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427