Khawvelin hlauthawng taka a ngaihven leh a thlir mek, Omicron variant chu India ramah mi 26-in an kai tih hmuh chhuah a ni tawh a, an zingah na em em an awm lo niin Zirtawpni khan a sawi.
“A vaiin ram chhunga Omicron kai hi mi 25 an awm tawh a. A kaite hi an vaiin natna nasa nei lo vek an ni a, tun hnaia hri kai hmuh chhuah zinga 0.04% pawh tling lo hi Omicron variant kai an ni,” tiin Zirtawpni tlaia union health ministry-a joint secretary, Lav Agarwal-an thuthar lakhawmtute a kawmnaah a sawi.
Agarwal-a’n he thu a sawi hnu lawkah hian Mumbai-a Dharavi vengah Omicron kai hmuh chhuah pakhat a awm leh thu Maharashtra sorkar chuan a puang zui.
Dharavi-a hri kai hmuh chhuah hi kum 49 mi mipa niin Inrinni kal taa Tanzania ram atanga lut a ni a. Invenna pakhat mah la la lo ni mah se natna engmah a nei lo niin sorkar chuan a sawi.
December 1 atanga ram dang atanga India-a lutte endiknaah mi 93-in hri an kai tih hmuh chhuah tawh a ni a. Heng zinga mi 83 chu sorkarin Omicron kai an awm tawhna ram a nih avanga ‘hlauhthawnawm’ huanga a dah atanga lutte an ni a. Mi 13 erawh ram danga mi an nih thu Agarwal chuan a sawi.
Healh ministry hotuin a sawi dan chuan Omicron hi ram hrang hrang 59-ah a kai an awm tawh.
“November 24 thleng kha chuan ram pahnihah chauh Omicron kai an awm kha a ni a. Tunah erawh chuan ram 59 zetah an awm ta a. Heng ram 59-ah hian Omicron kai hi mi 2,936 an awm tawh a, hengho bakah hian rinhlelhawm mi 78,054 an awm bawk a, heng mite hian eng variant ber nge an kai tih enfiah (genome sequencing) mek a ni,” a ti.
Sorkar hian tun hnaia ram puma hmai tuam an tlem leh Covid-19 laka himna tura tih tur zawm an tlem ta chu a ngaimawh a. “WHO-in hmai tuamna hmang an tlem ta hi a ngaimawh hle a. Khawvel pumah Omicron-in mi a tibuai mek a, tunah hian hlauhawm tak dinhmunah kan ding a, invenna lak leh hmai tuam hi a pawimawh em em tih kan hre reng tur a ni,” tiin NITI Aayog-a hriselna lama member, Dr VK Paul chuan a sawi.