Mizoram sorkarin hnathawh tur zawngtute himna atan hna zawn saktute (placement agencies) te zawm tur inkaihhruaina nimin khan a tichhuak.
Mizoram private placement agencies (regulation) act 2015 leh Mizoram private placement agencies (regulation) rules, 2017-in a sawi angin private placement agency ten Mizoram pawna hnathawk tura domestic worker an tirh te chu an kal tir atanga ni 7 ral hmain an chanchin kimchang district bawrhsap hnena an thehluh a ngai dawn.
Private placement agency-in domestic worker hnen atangin fee eng chi mah an la tur a ni lova, kum 18 hnuailam te, court-in thiamloh a chantir (criminal record nei) te, pianphung leh rilru lama rualbanlote domestic worker atan chhawr theih an ni lo.
Domestic worker hming leh address, an hnathawhna hmun leh an thawhnaa biakpawh theih ngei contact number te private placement agency-in register-ah an chhinchhiah tur a ni a. Domestic worker tur te chu an chanchin police-in an finfiah hmasa tur a ni a, police-in an chanchin an finfiah hmasak loh te chu agency-in domestic worker atana a rawih emaw hnathawk tura tirh theih an ni dawn lo a ni.
Domestic worker tur chuan training an nei hmasa tur a ni a. Training kalpui dan tur leh tul dang te inkaihhruainaah chuan tarlan a ni bawk.
Private placement agency ten office pawnah agency hming leh licence number chuanna signboard an tar ngei a tul a, an awmna hmun an sawn a nih chuan an insawn atanga ni 7 chhungin district bawrhsap hnenah an inhriattir a tul dawn bawk a ni.