Commerce & Industries Minister Dr R Lalthangliana chuan Covid-19 avanga Mizorama industry-ten harsatna an tawh dante sawipuiin, sorkar laipui hruaitute chu tanpuina pek an nih chuan hnathawk chhunzawm thei lova khar mai hmabak an nih thu a thlen.
Delhi-a sorkar laipui dawra zin, Dr R Lalthangliana chuan Ministry of Micro, Small & Medium Enterprises (MSME) hotute kawmin, hripui leng vanga eizawnna tlachhiate chhanchhuahna tur sorkar laipui atanga tanpuina pek an nih loh chuan industrial unit tam tak chu hnathawk chhunzawm thei loa khar mai hmabak an nih thu a thlen a. Sorkar laipuia Micro Enterprise-te chhanchhuahna tur, ‘Proposal for Special Economic Package’ an thehluh tawh chu tihhlawhtlinsak ngei turin a ngen a ni.
Dr R Lalthangliana hian Mizorama industrial unit zinga 97.36% chu micro enterprise an nih thu sawiin, an dinhmun a that chuan ei leh bara intodelhna kawngah nasa takin a mumal theih phah dawn niin a sawi a. MSME guidelines nen inmil lo deuh pawh nise a pawimawhzia an hriatsak a tul thu a sawi.
‘Proposal for Special Economic Package’ bakah hian Industrial Growth Centre, Luangmuala mi chu a ruhrel leh thil pawimawh dang tihphuisui a pawimawh thu thlen bawkin, MSME hnuaia SFURTI scheme thar hmanga Mizoram hmun thenkhata hmalak nghal a tul thu a thlen.
Health Minister Dr R Lalthangliana hian Rajesh Bhusan, Secretary, H&FW hmuin, National Health Mission, Mizoram tana kum 2021-22 chhunga hman tur Rs. vbc. 140 ruahman sa sanction muang lutuk chu a ngaimawh tih sawiin, Mizoram sorkarin a tih ve ngai awmte nen enzuiin hmanhmawh lehzuala hmalak a nih tur thu an sawi.
Heng bakah hian Covid-19 kai damlote mamawh damdawi man to leh vang, Tocilizumab leh Remdesivir chungchang pawh a sawipui a, union health secretary hian Mizoramin a mamawh zat an thlen chuan a lo tihfel nghal tur thu a lo hrilh a, Zoram Medical College tihchangtlunna tura hmalak dan tur an sawi dun bawk.