Mi tam takah chuan chaw pai tawih theih loh hi ze chi hrang hrangin a awm thei a, kan pumpui chak zawng a inang vek kher lo tih chu kan hre chiang theuh awm e. Kan pumpuiin chaw a paitawih theih loh chuan pum a lo puar pung a, vawih leh irh a lo nasa a, a thenah phei chuan kawthalote hial a thlen thei a ni.
Mi thenkhatah hi chuan ‘Lactase’ pianpui loh vang a ni thin a, he enzyme hi chaw pai tawih kawngah a pawimawh hle a ni. Bawnghnute hi a bikin ‘Lactase’ tel lo hian paitawih lohvin a in up thur a, chu chuan pum a tinuam lo ta thin a ni.
Enkawl dan : Hetianga pum nuam lo a awm hi chuan chaw ei loh vang vang a, pumpui hahchawlhtir a tha ber a, darkar 24 chhung chu chaw khal lam chi ei miah lo va, tui leh thei tui ang vel chauh ei rih tur a ni. A hnua a rawn awm leh chuan bawnghnute chi reng reng insum a, a la that loh cheu chuan mi thiamte rawn vat tur a ni ang.
THIL LEM HARSAT:
Thil lem hi hrisel
pangngai tan pawh harsa tak a ni a, kan hmai, lei, hrawk leh chaw dawta tihrawl zawng zawngte intuahrem a ngai a, tin, heng tihrawlte hi hriatna thazam chi hrang hrang panga (5) in a chawm avangin thil awlai tak chu a ni lo hrim hrim a ni. A thlen theitute lo thlir ho dawn ila :-
a) Chaw dawt hliam:
Chaw dawt hi acid in vang emaw thil dang hlauhawm in vang emawin a lo pem awlsam em em a, hetia a lo pilh emaw hian thil reng reng a lem hleih theih thin lo va, thisenzam atanga chaw (chiu chi) pek a ngai thin a ni. Tin, a lo dam zel pah hian chawdawt chu a lo zim telh telh thin bawk a, chu chuan thil lem a tiharsa thin a ni.
b) Chaw dawt cancer: Chaw dawt cancer hi a hmawr lampangah a awm thin tlangpui a, hei hian a kua chu hnawh chepin chaw lem a lo harsa ta thin a ni.
c) Kan sawi tawh ang khan chaw lem tur hian tihrawl chi hrang hrang a ngai a, heng zingah khawi emaw ber a lo zeng hian thil lem a harsa ta thin a ni.
d) Chaw dawt nekchep thei reng reng: a bul vela thil hrang hrang awmte hi a len thut emaw a lo than thut hian chaw dawt chu a nekchep ta thin a, chu chuan thil lem a tiharsa ta thin a ni.
e) Lei cancer, ka chhung leh a bawr vela pan a lo awm hian thil lem a harsa bawk thin.
f) Chaw dawta thil tang vangin thil lem a harsa thei bawk.
g) Hlauhthawn lutuk emaw rilru hah lutuk emaw hian thil lem a harsa bawk thin a ni.