Cricket Association of Mizoram hnuaia tualchhung hmeichhe cricket inelna CAM Women’s One Day Trophy final-ah Team Dingdi an chungnung a. Wicket 9 in Team Ainawn an hneh.
Suaka Cricket Ground-ah final hi khelh a ni a. An bowler te chetthat rah sengin Dingdi in chak turin run 86 an mamawh a. Over 23.2 chhungin an mamawh ang zat run hi an siam a, hnehna an chang.
Final inkhel
Team pali te an inkhelh kual hnuah a ti tha pahnihin final an khel a. Tunhnaiah khua a chhiat thin avangin final inkhel pawh a nghawng.
Over 50 khelh tur chu 35 ve ve ah tlakhniam a ni a, boruak a hnawn avangin an inkhelhna pitch-ah run siam tam a har.
Vuak hmasak thlang Ainawn tan an rinrawl ber Lalrinfeli Pautu chuan ball 46 atang run 26 a siam a. Mizoram senior team a batter Felfeli hi a out hnuah Ainawn in partnership mumal an nei hleithei lo.
Felfeli dinpui Lalmuanpuii Ralte leh Thelma ten run 14 leh 11 an siam a, over 29.3-ah out zovin run 85 Ainawn in an siam.
Dingdi boweler te zingah K. Lalthafamkimi chuan wicket li a la a, Ainawn innings an kharna hmanraw pawimawh a ni a. Wicket hnih ve ve la Hriatbiki Khawlhring leh Remremi ten Ainawn innings tir lama wicket paiwmawh la an ni a. Mamta Rai chuan wicket khat a la.
Dingdi atanga vawmtute zingah run 20 aia tam pe pakhatmah an awm lo bawk.
Dingdi tan over 35-ah run 86 siam chu a huphurhawm lova, inrintawkna nen hmanhmawh lovin an vua. Bul tantu J. Zothansangi’n out lovin run 27 a siam a. A dinpui Siamsiami (12) a chhuah hnuah tun tournament a run siam hnem ber Julie Malsawmtluangi a lut a, ball 18 hmachhawnin 4 runs vawi thum a vua a, run 25 siamin a tawp thleng damin Dingdi an chak.
A behbawm
CAM Women’s One Day trophy hi Mizoram a hmeichhe cricketer te pual inelna a ni a. He tournament-ah hian level hrang hranga Mizoram team tana khel tawh player te leh state team trial hmachhawn tawhte a tel theih.
Player te hi rualkhai zawka team pali a then an ni a. Mizoram player te tualchhungah an inkhel.
Champion team in Rs. 55,000 an dawng a, pahnihna in Rs. 50,000 dawngin team dang pahnihten Rs. 45,000 an dawng.
Tournament a mimal chawimawina dawngte leh final a player of the match chawimawina dawngte hian mimal theuhin Rs. 1000 an dawng tel bawk.
CAM Women One Day Trophy 2021 Final
Aizawn vs Dingdi
Suaka Cricket Ground, Sihhmui, Aizawl, |35 Ov.| December 10, 2021
Toss: Ainawn in vuak an thlang
Ainawn 85/10 (29.3 Ov)
Lalrinfeli Pautu (26 (46)
Lalmuanpuii Ralte 14* (30)
Thelma 11 (16)
K Lalthafamkimi 4/12 (4)
Hriatbiki Khawlhring 2/15 (7)
Remremi 2/15 (5)
Dingdi 86/1 (23.2 Ov)
J Zothansangi 27* (83)
Julie Malsawmtluangi 25* (18)
Siamsiami 12 (41)
Dindini Hauzel 0/12 (7)
Lalhriatpuii 0/17 (7)
Dingdi wicket 9 in an chak
Player of the Match : K Lalthafamkimi (Dingdi)
Individual Awards
Best batter – Julie Malsawmtluangi (Dingdi) 203 runs in 3 innings
Address : Ramhlun Vengthar/Mamit
Best bowler – PC Vansangzuali (Zamzo) 8 wickets in 2 matches
Address : Vaivakawn/ Khawhai
Player of the tournament – Lalrinfeli Pautu (Ainawn) 187 runs & 4 wickets in 4 innings
Address : Durtlang/Hnahthial