Red Bull car khalhtu Max Verstappen chuan nizan a Formula 1 season intlansiak hnuhnung berah lap hnuhnung berah a elpui Lewis Hamilton a lehpel a. Pakhatna hauhin a vawikhatna atan F1 world champion a ni.
Abu Dhabi a Yas Marina Circuit a intlansiakah hian world champion nih tum pahnihte point inzatin bul an tan a. Pahnihna atanga tlan tan Lewis Hamilton-a’n intlansiak tan tir atanga a tawp dawn thleng chan tha zawk a chang.
Mahse a tawp khardanin sawi a hlawh a, a hnung lama car chesual avanga intlansiak chawlh lailawk a nih a, tlan tan leh dan chu Red Bull lawmah a tla a. Kum 24 a upa Verstappen-a’n vawi sarih world champion ni tawh a pel.
Season ropui khar dan a ropui!
Kumin Formula 1 world champion inchuhna hi F1 chanchin a season ngaihnawm ber zing ami a ni a, a kharna intlansiak pawh a hmuhnawm.
Qualifying a tlan chak ber Verstappen-a’n a hmasa ber atangin bul a tan a, mahse a hnung chiah a awm Hamilton a tlan chhuak tha zawk. British driver hi medium compound tyre hmang chungin a nem zawk hmang Verstappen aiin a tlan chak zawk nghal a, a tirah Verstappen hian tlan pel mahse Hamilton hi nek chhuakin pawn atangin Mercedes car chu a hmaah a tlan lut leh a. Intlansiak thuneitu FIA lamin Hamilton chu a fal bikna awm lo turin tlan muang turin an ti a, an inum that tir leh.
Mahse tlan chak zawkna soft tyre hmang Red Bull in ‘race pace’ nei tha zawk Mercedes a um pha lova, lap 14 an tlanin Red Bull in hard tyre in a tawp thlen tumin ‘risk’ an la. Mercedes pawhin Red Bull tih ang zelin tih an tum a, lap dawt lehah an thlak ve nghal.
Red Bull in an car dang zawk khalhtu Sergio Perez hmangin theihtawp chhuah mahse Hamilton an veng zo lova, mahse a tawpah erawh an vanneihna a inherchhuak.
Lap 5 a la awmin Williams car a chesual a, safety car tirhchhuah loh theih a ni lo. Hei hi Red Bull in remchangah an la a, tlanchak theihna ber soft tyre an vuah. Mercedes in an dinhmun tha chu ‘risk’ an tum lova, lap 38 a upa tawh hard tyre in an tlan tlang dawn.
FIA in lap khat chauh awmah tlan tan leh tur a tih hma in Verstappen leh Hamilton te inkar a car zawng chu safety car hma a tlan turin a ti a. Red Bull car, tyre thar zawk leh tlanchak zawk vuah an chak ta zawk.
Sawizui a tam dawn
Mercedes hian nizan khan FIA thil kalpui dan chu F1 dan tlawh chhanin complaint vawi hnih an thehlut a, he boruak hi tunkarah a la kal zel dawn.
Chutihrualin hnehna changtu Red Bull team fak loh theih an ni lova, Mercedes aiin thutlukna an siam a fuh thin.
Qualifying huang hnihnaah Verstappen-a’n tihsual a neih avangin car tyre nem ber nen bul a tan a ngai a, heti chung hian intlansiak chhunga chawpchilh taka thutlukna dik vawi hnih an siam avangin Verstappen-a car ke vawi hnih an thlak hman, an ti fuh.
Mercedes erawhin tyre khek thiam Hamilton an ring lutuk a, safety car vawi hnih a awm chunga tyre hlui an ring tlang chu thil thleng dang karah an tuar.