National Legal Services, Authority (NLSA) in ruahmanna a siam dung zuiin Inrinni khan Mizoram State Legal Services Authority (MSLSA) leh district pariata District Legal Services Authority (DLSA) chuan hmun hrang hrangah Lok Adalat an nei a, Rs 6,11,31,195 hu thubuai an ching fel.
Lok Adalat neihna hmunahah hian thubuai rel tura lut tlingkhawm chu 2,238 a ni a, thubuai 201 rel fel a ni. Thubuai chin fel zinga sum leh pai kaihhnawih chin fel zat chu Rs 6,11,31,195 a ni.
‘Mipuite Court’ tia sawi thin, Lok Adalat-ah hian thubuai – compoundable case te, inhmun lo ram thubuai leh ro inchuh thubuai te, leiba thubuai bakah thubuai dang tam tak a rel theih a. Conciliator-ten thubuai lian pui pui leh khirhkhan tak takte pawh an lo rel fel tawh thin a ni.
Kar kalta Inrinnia thubuai ngaihtuah zingah nationalised bank hrang hrang atanga loan leiba chungchang thubuai a tam ber a, a dawtah telephone, landline leh mobile phone bill ba niin, a dawt lehah money suit a ni.
Lok Adalat rorelnaah hian sum senga Ukil rawih a ngaih ve loh avangin senso a awm ve lo a. Rorel kalphung hi law court-a mite nen chuan a dang daih a ni.
Thiam loh chang zawk pawh awm se, inhremna pek a ngai kher lo va. Thiam chang zawk pawh inphah hniam tura ngen leh thiam loh chang zawk pawhin a tihdik lohna te pawma inremna zawnpui chu Lok Adalat thil tum ber a ni.
////////////