Mizorama kohhran lian ber, Presbyterian Kohhrana inkhawmpui lian ber, December 7, 2021-a tan, Synod Inkhawmpui chu nimin khan a tiak.
Presbyterian Republic Veng Kohhran biak Ina Synod Inkhawmpuiah hian Zirtawpni leh Inrinni khan palaiten ro an rel a. Hetah hian nau piang pun theih nana sorkar hnathawk maternity leave pek belh rawtna chu a tha an ti a, ‘SEC-in bawhzui rawh se’ an ti.
Agenda zinga mi, sate ramri buai chungchangah sorkar tha tichak tura hmalak leh rawtna chu ‘sawihona hi a tawk e’ tih a ni a. Synod hnuaia chet velna a sap tawng hmante hi a theih chen chenah Mizo tawnga thlak rawtna chu tha an ti a, hmalak mekna a ni tih an inhrilhfiah.
Inrinnia rorel inkhawmah hian rualbanlote survey neiha anmahni chhawmdawl dan tur ruahman rawtna chu sawiho a ni bawk a. Rualbanlote chhawmdawl dan kawngah tualchhung kohhrante nasa lehzuala hma la tura inchah bawk a ni.
Nimin inkhawmpui tiak ni, chawhma inkhawmah Pastor nemngheh leh Pro. Pastor dah ngheh inkhawm buatsaih a ni a. Chawhnu lamah minister thi sunna hun hman a nih bakah moderator kalchhuak tur sermon hnuhnung ngaihthlak a ni.
Kumin Synod inkhawmpui hi hri leng avangin inkhawmpui palai tur hi hun dang aia tlem ruat an ni a, zan lamah Pathian biak inkhawm a awm lo bawk.