Ngen tak tein ngen mah se, a hlawhchham chiang hle si a ni! A hla hit tak, ‘Shake It Off’-a hla thu thenkhat chu copy ngei nia puhnaah Taylor Swift-i’n thubuai a hma-chhawn ngei dawn ta.
Kum 2014 a hit kai hi 2001 kuma hmeichhe group 3LW, ‘Playas Go’n Play’ a hla thu lak chungchanga Taylor-i’n thubuai kaltlangpui lo tura a ngenna chuan court lamin a hnawl.
Danglamna awm lem lo
Hlaphuahtu pahnih Sean Hall leh Nathan Butler te chuan 2017 khan hmeichhe band 3LW tana an phuah hla thu hi Taylor-i’n a copy ngei tih an sawi a, heti ang hi an hla thu awmdan chu a ni: “Cause the players gonna play, play, play, play, play” and “haters gonna hate, hate, hate, hate, hate.” Pakhat zawkah, ‘Playas Gon’ Play’ goes: “Playas, they gonna play, and haters, they gonna hate.”
He thubuai hi February 2018 khan court lamin a thutlingah a ngai lo hman a, mah se thubuai siamsaktu te lam hi beidawng lovin court sang zawkah an kal leh a, October 2019 khan case hnawl tawh chu thar thawh leh niin, September 2020 khan Los Angeles judge chuan case hi kaltlangpui a nih tur thu a sawi ta a ni.
‘Shake It Off’ copyright thubuai ngaihtuah \an hun tur tak hi sawi chian a la ni lova, US Charts-ah te pawh ‘ber’ lo ni tawh leh, Taylor Swift tana single hralh kal ber thubuai hi rimawi khawvelin a ngaihven hle.
PASAL NEIH NGAM LO
Hetih lai hian, Taylor Swift (31)chuan inngaihzawnna hrisel leh rinngamna tak tak a awm phawt loh chuan pasal neih hi thil hmanhmawh thlak takah a ngai lo, a ti.
‘Lover Story’ hla atanga hriatlar hian Joe Jonas , Taylor Lautner, John Mayer, Jake Gyllenhaal leh Harry Styles te a lo kawp tawh thin a, ‘hmangaihna vanduai’ chu a chan tawk a ni thin.
“Inneihna hi thil ropui tak a ni a, chutih laiin, ropui lem lo takte pawh ka hmu tho. Inneihna nghet tak a awm theihnana theihtawp chhuahtute pawh ka hmu a, bei tang tangte chenin ka hmu tawh. Beihpuithlak man a awm chiah reng em ka ti a ni.
“Hmangaihna hi engtiklai mai pawha awlsam reng turah chuan ka ngai lo. A nihna takah chuan, a tam zawk hi thil hrehawm leh rilru natnaah a chang fo zawk.
Hei hi pawimawh
“I hlauh chang pawh a, ‘Ka kalsan ngai lovang che’ titu tur che kha an pawimawh em em a, i chian loh lai pawha chianna pe theitu an nih ngawt loh chuan inneihna hi ngaihtuah thui vak pawh ka la peih lo,” a ti.