Formula 1 official te chuan Pathianni zana Abu Dhabi Grand Prix tawp dan sawisel hlawh tak avanga Mercedes in an hnena complaint pahnih an thehluh chu an ngaihtuah hnuah an hnawl a. Anglo-German team hian F1 official-te thutlukna hi court sang zawkah ngaihtuah nawn leh tura thlen an rilruk.
Thil thlen dan
Yas Marina Circuit-ah Mercedes car khalhtu Lewis Hamilton chu Red Bull in an thiamna leh theihna zawng zawng sengin, tactic hrang hrang hmangin ven tum mahse an thei lova. ‘Race pace’ nei tha zawk Mercedes car hi umpha ngang lovin hnehna an chang dawn a, Hamilton-a’n a vawi riat nan world champion nih a pan.
Mahse lap 53-naah Nicholas Latifi khalh Williams car chu kual 15-naah a chesual a. Car lachhuak tur leh kawng tihfai a nih nan safety car tirh luh a ni.
Red Bull in he intlansiakah a hmasa lama an tih ang bawkin thutlukna rang leh dik an siam nghal a, lap 53-ah hian Max Verstappen chu a ke thar vuah turin pit stop nei turin an ko lut. Pahnihna atang a lut a, a chhuah lehin pahnihna hauh tho mahse Hamilton nen an tlan pelh tawh car (Backmarker) panga an awm. Dan pangngai angin tlan se a hma a car ten Verstappen hi kian vek dawn mahse hun paih chin a nei dawn tho.
Safety car hnungah car zawng zawngte an tlanchak phal a ni lova. A hmahruaitu hnunga awmte tan a ke thlakna remchang nimahsela a hmasa ber a awm tan safety car laia ke thlak hi a rem ve lo fo. Pahnihna a awm nen an inkar a zauh tawk loh chuan a hmahruaina a hloh thei a, Verstappen-a chunga thleng ang bawkin a hmaah ‘backmarker’ a tam lutuk thei bawk.
Hei vang hian Mercedes in Hamilton an ko lut ve lova. Tyre, tlanchakna aia tlo tura duan, a sak ber ‘hard compound’ lap 14-na a an vuah tawh chu a la ring tlang a. Max-a’n a thar hlak, tlanchakna tur a nem ber a vuah avangin lap 4 la awmah an inum leh a nih chuan British driver hian tih theih a nei dawn lo tih a hre sa.
Thutlukna chu
Safety car hnuaiah lap hnih an tlan zo tawh a, lap 58 tlan tura lap 56-na an tlan tanin race director Michael Masi chuan safety car a tlan hnua bul tan leh hma a an tih thin ang tih a remti lo. Chu chu a hmahruaituten an tlan pelh nawn leh tawh (lapped cars) tan a hmahruaitute tlan khalh a, a hmalam inumna an tihbuai lohna tura hun hawn thin a ni a. Hei hi Pathianni zanah lap a tam tawh loh avangin a remti lo.
Red Bull in lap a tam tawh loh avangin Verstappen leh Hamilton inkarah car a tam si nen chakna ‘chance’ an nei dawn lo tih an inhria a, an lawm lova. Red Bull boss Christian Horner chuan Masi hi bia in an inkar a car-te chu kal tir a, lap khat tal intlansiak tir turin a nawr.
Masi-a’n thutlukna a siam nawn leh a, a hma a thu sutin lap 58 tlan tura 57-naah Red Bull leh Mercedes inkar a car pangate chu safety car hma a tlan turin a ti a. An tlan fel veleh safety car a tlan lut anga lap hnuhnung berah an inum ang.
An inkar a car an awm tawh loh hnuah second 11 chuang a lap 52-na a hma la hruai Hamilton leh Verstappen te inkarah awl a awm tawh lova. Ke thar, tlan chakna zawk hmang Verstappen-a tan Hamilton chu bel chhung sa a ni tawh.
An tlan lehin kawi 5-naah Verstappen-a’n a pel nghal a, kawi 9-naah Hamilton-a’n pelh letna hun a nei a, a tum ngial a, mahse a tyre a hmang ral hnem tawh a, a hlui tawh avangin kualah pel leh turin a tlan chak thei tawh lo.
Mercedes lawm lohna
Mercedes team principal Toto Wolff chuan Masi-a thutlukna chu radio kaltlanga sawisel nghalin a au chhuak a, mahse Masi-a’n intlansiak ngei a tawp an duh avangin Wolff-a selna a hnawl.
A zawn tawh hnuah Mercedes in intlansiak thuneitute hnenah conplaint an thehlut a. A hmasa zawkah chuan intlansiak bul tan tir dan a ni a, a hnuhnung zawkah chuan intlansiak tan leh dawn a Verstappen-a car a pawng zawk thin chu a ni.
F1 dan Article 48.12 tlawhchhanin Mercedes an tang a, he danah hian intlansiak thuneitu in him a tih hnuah ‘lapped cars’ te chu “safety car pelhna hun siam a ni e’ tih hriattir vek an ni ang a, hemi a zawh vek hnuah intlansiak chhunzawm a ni ang.” tih a ni.
Hei hi Masi-a’n a zawm lova, Hamilton leh Verstappen inkar a car te chauh tlan tir an ni a, Verstappen-a leh pathumna a tlan Carlos Sainz te inkar a mi leh a hnung a car dangte tlan tir an ni ve lo.
Article 48.12-ah vêk hian “lapped car hnuhnung berin hmahruaitu a pelh fel hnuah safety car hi a tlan lut anga, lap dawt lehah intlansiakna chhunzawm a ni ang.” tih a awm bawk. Hei hi zamw ni lovin car 5 an tlan chhuah fel hnuah an tlan lehnghal.
He dan pahnih hi zawm nise lap a tam tawh loh avangin Mercedes hi chak tur an ni.
Mahse Mercedes complaint an ngaihtuahnaah hian race stewards ten race director chu article 48.13 avangin he thutlukna hi a duh angin a siam thei an ti a. Team-te hriattir an nih tawh chuan safety car koh luh hun hi a duh hunah a ti thei an ti.
Contructors’ title latu ni ta tho Mercedes hian intlansiak result chu lap hnuhnung ber dawttu a an inzui dan anga lak nise an tih chu race steward-te hian an pawm lova. Lap tlan zat tur an tlan dawn loh avangin an pawm thei lo.
Complaint pakhat zawk Verstappen a pawng zawk tih chu an hnawl nghal thuai a. Safety car luh hnua tlan chunga bul an tan that lehna (rolling start) ah Verstappen hi Hamilton-a hnungah chiang takin a awm a, an inkar zau zawng tur pawh a dik tih a hmuh theih.
Engtin zel?
Mercedes hian an complaint hmasa zawk an ngaihtuah dan chu thuneihna sang zawka thlen an tum a, hemi tur hian darkar 96 an nei a, uluk zawka inngaihtuah nan hun an hmang dawn.
An kut a tla ngei tur hnehna chu FIA lamin an duhdan anga intlansiak kalpui a nihna turin dan pelin thil an ti niin an ngai a. Hetihlai hian hmun thenkhatah erawh F1 mualphona tura thil tihluih an duh lo niin an sawi thung.
FIA thutlukna hi TV lamah leh mipui hmuh a F1 a hmuhnawm leh a ngaihnawm zawkna tura hralh a tlak nan an ti niin an ngai.